28 майя 2022

ДЗИЛЛОН ВАКЦИНАЦИЙ ФÆРЦИ…

18.06.2021 | 21:45

Куд иннæ уæрæсейаг регионти, уотæ Цæгат Иристони дæр идарддæр цæуй коронавируси нихмæ дзиллон вакцинаци.

Уотæ, зæгъæн, Дзæуæгигъæуи косунцæ, уæззау нези нихмæ прививкитæ искæнæн кæми ес, уæхæн сæрмагонд пункти. Етæ æрбунæттон æнцæ 1, 4-аг ама 7-аг поликлиникити, уæдта Æфсæнвæндаги сæйгæдони. Районти цæргутæ вакцинаци кæми кæнунцæ, еци бунæтти номхигъд иссерæн ес Республикæ Цæгат Иристон-Аланий Æнæнездзийнадæ гъæуайкæнуйнади министради официалон сайти.

Уомæй уæлдай, адæми уодæнцойнæн пайдагонд цæуй вакцинацигæнæг мобилон къуæрттæй дæр. Медикти уæхæн къуæрттæ сæрмагонд фæткæмæ гæсгæ бабæрæг кæнунцæ кустуæттæ æма организацитæ, уæдта базарадон центртæ æма æндæр æхсæнадон бунæттæ.

Специалисттæ идарддæр дæр сæ цæстæ дарунцæ, нури уæнгæ вакцинаци кæмæн искодтонцæ, еци адæми уавæрмæ. Дохтирти дзубандимæ гæсгæ, прививкити фæсте адæм сæхе хуарз æнкъарунцæ.

Уой хæццæ, зæгъун гъæуй, «Гам-КОВИД-Вак»-æй уæлдай, республикæмæ иннæ уæрæсейаг вакцинитæ ласун ке райдæдтонцæ, уой туххæй.

Куд раздæр, уотæ нур дæр вакцинаци æй барвæндон æма лæвар. Укол искæнуни туххæй бацæун гъæуй фæзуатон поликлиникæмæ, кенæ хе ниффинсун паддзахадон лæггæдти портали фæрци.