Цæгат Иристони Хецауади Сæрдар ДЗАНАЙТИ Барис (рахесæрдигæй) æма нæ республики мухури æма дзиллон коммуникацити гъуддæгути фæдбæл Комитети разамонæг ФИДАРАТИ Юрий зонгæ кæнунцæ, форуми рæстæг ци равдиститæ арæзт æрцудæй, уони хæццæ.

Нæ республики Сæргълæууæг Сергей Меняйлой хъæппæресæй æрæги Дзæуæгигъæуи рацудæй Æхсæнадæмон медиафорум «PRO Кавказ». Аци мадзал арæзт æрцудæй дуккаг хатт. Æма аци анз æ архайгути фæзуат зингæ фæуурухдæр æй – Цæгат Кавкази федералон зилди минæвæрттæй уæлдай Дзæуæгигъæумæ исаккаг кодтонцæ Мæскуй, Идард Хорискæсæн æма æндæр уæрæсейаг регионти, Белоруссий, Сомехи, Хонсар Иристони делегацитæ дæр. Архайдтонцæ си нæ республики разамунд, Цæгат-Кавказаг федералон зилди Уæрæсей Федераций Президенти Минæвайради бæрнон косгутæ…

Дууæ боней дæргъи (12-13 июли) форуми архайгутæ – Цæгат Кавкази федералон зилди журналисттæ, блогертæ, киунугæуадзгутæ, паддзахадон æма æнæкоммерцион структурити бæрнон косгутæ, экспертон æхсæнади, уæдта ма Белоруссий æма Сомехи медиакъабæзти минæвæрттæ – æрдзубанди кодтонцæ профессион дæсниади фарстатæбæл, делегацити иуонгтæ зонгæ кодтонцæ кæрæдзей фæлтæрддзийнади хæццæ, дзурдтонцæ еумæйаг информацион проекттæбæл.

Аци мадзали фæдбæл бæлвурддæр æрмæгутæ мухур кæндзинан нæ газети хæстæгдæр номерти.