Аст æма инсæй анзи рацудæй, Республикæ Цæгат Иристон-Аланий Горæтгæрон район æма Дзæуæгигъæуи 1992 анзи ци трагикон æма зæрдресæн цаутæ æрцудæй, уæдæй нурмæ. Куд иннæ хæттити, уотæ бабæй нур дæр 30 октябри республики цæргутæ архайдтонцæ аллихузон номерæн мадзæлтти.

Æ райгурæн бæстæ гъæуайгæнгæй, ка фæммард æй, еци æдзард бæгъатæрти рохс нæмттæ иссирдтонцæ, Камбилеевки æнсувæрон цирт æма Дзæуæгигъæуи Намуси Аллеямæ ка ’рбацудæй, еци адæм.

Саударæн æмбурдти архайдтонцæ Цæгат Иристони Сæргълæууæг Битарти Вячеслав, республики Парламенти Сæрдар Алексей Мачнев, Республикæ Цæгат Иристон-Аланий Хецауади Сæрдар Тускъати Таймораз, хецауади иннæ паддзахадон къабæзти бæрнон косгутæ æма æхсæнади минæвæрттæ.

Республики разамонгутæ деденгутæ исæвардтонцæ бæгъатæрти циртдзæвæнтæбæл, еу минут æдзæмæй ралæугæй, иссирдтонцæ, Фидибæсти сæрбæлтау æ цард ка нæ бавгъау кодта, Иристони еци хъæболти нæмттæ.