25 июля 2024

ЕС НÆМÆ ИСКУРДИАДÆГИН ФÆСЕВÆД!..

25.05.2024 | 22:19

Цæгат Иристони Хетæгкати Къостай номбæл паддзахадон университети аййевæдти факультети актери дæсниади хайади студенттæ Дзæуæгигъæуи Вахтангови хæдзари равдистонцæ Николай Гоголи пьесæмæ гæсгæ спектакль «Уоскурд» ирон æвзагмæ Уæрæсей Федераций адæмон артист Хугати Геори тæлмацæй. Ка си архайдта, еци фæсевæд аци анз каст фæууодзæнæнцæ уæлдæр скъола.

Ахури дæргъи сæмæ æ цæстæ даруй æма исуйнаг актерти дуккаг фæлтæрæн финансон уагæй агъаз кæнуй амалгъон Хæдарцати Махарбег. Е æма университети проректор Кокайти Алан бадзубанди кодтонцæ æма æрæмбурд кодтонцæ Иристони искурдиадæгин фæсевæдæй сæрмагонд курс. Университети ахури фæсте ба етæ исфæлдистадон куст фæккæнунцæ Тæбæхсæути Балой номбæл Ирон академион театри.

Исуйнаг искурдиадæгин артистти къуари аййевадон разамонæг æма сæ фæлварæн, дипломон кусти размæ спектакли режиссер-æвæрæг æй Республикæ Цæгат Иристон-Аланий адæмон артист Æлбегати Алан. Равдисти райдайæни е арфæ ракодта, искурдиадæгин фæсевæди æрмдзæфæн аргъ искæнунмæ æма син рæствæндаги дзурдтæ зæгъунмæ ка ’рбацудæй, еци аййевади æма культури зундгонд косгутæн, æхсæнади минæвæрттæн, студенттæн, аййевадæуарзгутæн.

Номдзуд драматурги пьесæ «Уоскурд»-и зæрдагайгæ сорæттæ ка исæвардта, уони ’хсæн ирон ка нæй, уæхæн фæсевæд дæр ке нæ адтæй, е спектакльмæ кæсгути зæрдити æвзурун кодта никки æхцæуæндæр æнкъарæнтæ æма рохс равгæ. Номæй-номмæ сæ еугурей цæмæй ранимайæн, уой аккаг дæр æнцæ: Уруймæгти Дзерассæ, Абайти Артур, Елизаветæ Сотникова, Сехъоти Фаризæ, Джиоти Къоста, Дзиццойти Мурат, Калоти Константин, Бурнæцти Баграт, Хъулати Аланæ, Къаболати Беллæ, Золойти Дианæ.

Цæмæй студенттæ спектакль Вахтангови хæдзари равдесонцæ, уомæн син еугур гъæугæ фадуæттæ исаразтонцæ Евгений Вахтангови номбæл Мæскуй академион театри директор, Уæрæсей Федераций культури æскъуæлхт косæг Кирилл Крок æма Цæгат Иристони Хетæгкати Костай номбæл университети аййевæдти факультети декан, Вахтангови хæдзари арт-директор Атайти Мæдинæ.