Цæгат Иристони Сæргълæууæг Сергей Меняйло фембалдæй Уæрæсей Æнхæстбаргин минæвар, уæрæсейаг æмæхсæнадæ «Зонундзийнæдтæ»-йи лектор, паддзахадон æма æхсæнадон архайæг, философон наукити доктор Рамазан Абдулатипови хæццæ.

Фиццагидæр, Сергей Меняйло райарфæ кодта кадгин иуазæгæн, Цæгат Иристони еугур гъуддæгутæмæ уотæ къæрцгъос ке æй, уой туххæй. Мадта нæ финсунади хæццæ баст наукон-практикон конференций дæр Рамазан Абдулатипови архайд ирд фæд ниууагъта. Конференци исаразуни хъæппæрес равдиста Цæгат Иристони Национ политикæ æма æндагон бастдзийнæдти министрадæ, искодтонцæ ’й Славянаг финсунади бони кадæн.

– Цæгат Иристон æма Дагестани адæмти еу кæнунцæ берæанзиккон хæлар рахастдзийнæдтæ, рагон историон æма культурон бастдзийнæдтæ. Етæ иссæнцæ æмрахастдзийнæдтæ æма æмгустади бундортæ. Арфæ кæнун, нæ кириллици 190 анзей кадæн конд наукон-практикон конференций ке байархайдтай, уой туххæй. Уони фæрци нацити ’хсæн бастдзийнæдтæ федардæр кæнунцæ, æма адæмти ’хсæн хæлардзийнадæ гъæддухдæр кæнуй, – загъта Цæгат Иристони Сæргълæууæг.

Куд фæббæрæг кодта, уотемæй Уæрæсей Æнхæстбаргин минæвар, уæрæсейаг æхсæнадæ «Зонундзийнæдтæ»-йи лектор, паддзахадон æма æхсæнадон архайæг, философон наукити доктор, конференцийæй уæлдай ма дзиллон фембæлдтитæ искæндзæнæй паддзахадон æма муниципалон службæгæнгути хæццæ, уомæй уæлдай – Дзæуæгигъæуи национ-культурон æхсæнæдти минæвæртти хæццæ.

Лекторæн æ зæрди ес Æвзарæн къамиси иуонгти хæццæ фембæлун, дзубанди рауайдзæнæй Паддзахадон университети фæзтæй еуеми. Æрдзордзæнæнцæ адæмти цард исаразуни уæрæсейаг хузæ еу паддзахади медæгæ. Æнæмæнгæ, лекций байгъосдзæнæнцæ адæмтæ æма динти ’хсæн рахастдзийнæдти фарстатæмæ, уæрæсейаг паддзахади берæнацион структурæ аразуни нисантæмæ.

Цæгат Иристон-Аланий Сæргълæууæг æма Хецауади пресс-службæ