Уæрæсей экономикон ирæзти министри хуæдæййевæг Сергей Назаров æрæги ци æмбурд исаразта, уоми дзубандий зингæ æргом æздæхт æрцудæй Цæгат Кавкази регионти экономикон ирæзти раззагдæр проекттæмæ.

Цæгат Иристони гъæуама ци фондз раззагдæр проекти æнхæстгонд æрцæуонцæ, уони туххæй радзурдта республики Хецауади Сæрдар Дзанайти Барис. Сæ еумæйаг аргъ æй 64 миллиард соми. Цæгат Кавкази федералон зилди социалон-экономикон ирæзти департаменти разамонæг Игорь Храновский куд загъта, уотемæй аци анзи дуккаг квартæли Цæгат Иристон æ экономикон проектти сæйраг нимæдзтæ æнхæст кæнуй, æвдесуй хуæздæр бæрæггæнæнтæ.

«Агропромышленнон комплекс»-и ес фондз дæлпроекти, сæ хæццæ ес «Хъазахъаг хутор» дæр. Фæткъуй рæзбæлæстæ си ниййаразтонцæ 771 гектари, рæзæ æфснайæн исаразтонцæ 50 мин тоннемæн. Нуртæккæ си фæлгонцадон куститæ кæнунцæ, æ алфамбулайтæмæ ин зелунцæ. Гъаруæтти комплекс «Алани» исаразунæн радех кодтонцæ зæнхи хай, æ проектон-хæрзти гæгъæдитæ ин цæттæ кæнунцæ. Æрхонки станици инженерон инфраструктури объекттæ цæттæ кæнунцæ, мадта интеграцион агрохолдинг «Аланий æхсир» дæр арæзт цæуй.

Балеркæсалгæдарæн хæдзарадæ исаразунбæл дæр куст цæуй.

«Нæуæг туристон дестинацити ирæзт»-и проектæн ес дууæ дæлпроекти. «Алани-парк»-и фæзуати бал исаразтонцæ нади æма инженерон инфраструктурæ, гъæугæ ефтонггæрзтæ балхæдтонцæ, коммуникацитæ аразунцæ, бæлццæнттæласæн ауигъд над монтаж кæнунцæ.

1,7 километри дæргъæн лыжитæбæл бурæн трассæ аразунцæ. Туристон-рекреацион комплекс «Къæхтисæр»-æн специалисттæ исаразтонцæ инженерон хизтæ, нади еу хай аразунмæ бавналдтонцæ, иннемæн проект кæнунцæ.

Нæ республикæн сæйрагдæр æй «Мамисон»-и проект исаразун. Нуртæккæ коми аразунцæ нæдтæ: тъунел æма нади дууæ хайебæл косунцæ. Исараздзæнæнцæ си къанатон дууæ нади, лыжитæбæл бурæн хуæнхон трассæ, сноупарк, фæззиндзæнæй ма си æндæр гъæугæ гъуддæгутæ дæр.

Фæзуат инженерон фæрæзнитæй гъæуайгонд æрцæудзæнæй, уодзæнæй си 700 бунатемæй фулдæр.

Дзанайти Барис куд радзурдта, уотемæй Дзæуæгигъæуи аэропорти аразунцæ нæуæг аэровокзал, æндагон инженерон хизтæ си исæвардтонцæ, бæстихаййи медæггаг куститæ кæнунцæ, ефтонггæрзтæ си æвæрунцæ. Дзанай-фурт куд баханхæ кодта, уотемæй куститæ æнхæстгонд цæунцæ пъланмæ гæсгæ, объект аци анзи кæрон исцæттæ уодзæнæй. Еугур проекттæ дæр республикæн æнцæ гъæугæ, айдагъдæр экономикон æгъдауæй нæ ’нцæ ахсгиаг, фал ма син социалон ахедундзийнадæ дæр ес. Фæззиндзæнæй нæмæ 7,5 мин нæуæг кусти бунати. Республики разамунд сæмæ алкæддæр сæ гъос дарунцæ.

Уæрæсей экономикон ирæзти Министрадæ куд байамудта, уотемæй агропромышленнон комплекси исарæзт тæккæ фулдæр косæн бунæттæ ратдзæнæй.