06 декабря 2022

ЕУГУРУӔР ӔСЕУОН КОНКУРС «2022 АНЗИ АХУРГӔНӔГ»

22.03.2022 | 12:36

Ӕрӕги Дзӕуӕгигъӕуи арӕзт ӕрцудӕй педагогон косгути профессионалон дӕснидзийнади еугуруӕрӕсеуон конкурси «2022 анзи ахургӕнӕг»-и регионалон ӕркаст. Архайдтонцӕ си республики еумӕйагахурадон косӕндӕнтти 21 хуӕздӕр минӕвари.

Ерисгӕнгути дӕснидзийнадӕн аргъгӕнӕг адтӕнцӕ, Цӕгат Иристони ахурадӕ ӕма науки министр Алибегти Эллӕ разамунд кӕмӕн лӕвардта, еци минӕваргин жюрий иуонгтӕ.

Фиццаг къӕпхӕни конкурсанттӕ радзурдтонцӕ, методикон ӕрмӕгутӕй куд пайда кӕнунцӕ, уӕдта практикон ӕгъдауӕй равдистонцӕ, уроктӕ циуавӕр фӕткӕмӕ гӕсгӕ аразунцӕ, уой. Ерисгӕнгутӕй алкедӕр байархайдта темӕ «Методикон ӕрмадзӕ» еугурвӕрсугӕй раргом кӕнунбӕл…

Уотемӕй исбӕрӕг ӕнцӕ дуккаг къӕпхӕни 15 конкурсанти. Етӕ ба равдистонцӕ сӕ фӕсурокти кусти туххӕй ӕрмӕгутӕ, уӕдта исаразтонцӕ мастер-класстӕ.

Кӕронбӕттӕнмӕ жюри равзурста 7 арӕхстгиндӕр ахургӕнӕги. Етӕ идарддӕр рахъӕртун кодтонцӕ профессионалон дӕснидзийнади ерис – уотемӕй исбӕрӕг ӕй конкурси регионалон къӕпхӕни уӕлахездзау.

Фӕстӕдӕр жюрий иуонгтӕ куд радзурдтонцӕ, уотемӕй син ӕнцон нӕ адтӕй уӕлахездзауи равзарун, уомӕн ӕма ерисгӕнгутӕ равдистонцӕ сӕ кустбӕл устур ӕновуддзийнадӕ ӕма арф зонундзийнӕдтӕ. Фал уӕддӕр бӕрӕггонд ӕрцудӕй ахургӕнгутӕн сӕ  хуӕздӕрти хуӕздӕр (ӕ ном ин фегъосун кӕндзӕнӕнцӕ сӕрмагонд кадгин ӕмбурди).

Фембӕлди кӕронбӕттӕни Алибегти Эллӕ зӕрдиаг арфӕ ракодта, конкурсмӕ барӕ ка дардта, еугур еци адӕмӕн:

– Арази дӕн уӕ зонундзийнӕдтӕй, ӕхцӕуӕн мин ӕй, уӕ аллибони кусти еудадзугдӕр нӕуӕг мадзӕлттӕй ке пайда кӕнетӕ, скъоладзаути зӕрдити ахурмӕ турнундзийнадӕ ке игурун кӕнетӕ, уомӕй.