Аци анз Уæрæсей Социалон фонди цæгатиристойнаг хайадæ региони бийнонтæн еумæйаг пособи бафедунæн радех кодта 11,3 миллиард сомемæй фулдæр.

Амунд пособи нæ республики есунцæ æвддæс анземæй кæстæр 73,5 мин сувæллони æма 2,3 мин æнгъæлдзау силгоймаги. Гæнæн ес, æма фæццæрунæн гъæугæ тæккæ минкъийдæр хæрзти бæрцæй 50 проценти, 75 проценти æма 100 проценти ке бæрцæ уодзæнæй, феддони бæрцæ аразгæ ’й бийнонти еци æфтуйаги бæрцæй: æнгъæлдзау силгоймæгтæн нимайунцæ косунгъон адæмæн фæццæрунæн гъæугæ тæккæ минкъийдæр хæрзти бæрцæ (Цæгат Иристони – 18579 соми), сувæллæнттæн ба – сувæллонæн фæццæрунæн гъæугæ хæрзти тæккæ минкъийдæр бæрцæ (16534 соми).

Уæрæсей Федераций граждæнтæ ка ’нцæ æма еудадзуг Уæрæсей ка цæруй, еумæйаг пособийæн гæгъæдитæ исаразуни барæ ес нæ республики цæрæг уæхæн адæймæгутæн. Пособийæн гæгъæдитæ аразуни рæстæг пайда кæнунцæ бийнонти æфтуйæгтæ æма сæ есбонæн еумæйаг аргъкæнуйнади фæткæй, уæдта ниййергутæ косунцæ æви нæ, кенæ ба æгуст объективон рæуонæй æнцæ æви нæ, уони нимайунцæ.

Феддони фæдбæл барæ цæмæй исæвзура, уой туххæй хигъдон рæстæгмæ (12 мæйемæ) косунгъон бийнойнæгти æфтуйаги бæрцæ гъæуама уа тæккæ минкъийдæр 8 тæккæ минкъийдæр мизди бæрцæ, гъома, 216744 соми (аци анзи райдайæнæй фæстæмæ тæккæ минкъийдæр мизди бæрцæ ’й 27093 соми). Бийнойнаги рæстæмбес æфтуйаги бæрцæ адæймагæн фæццæрунæн гъæугæ тæккæ минкъийдæр хæрзти бæрцæй (гъома, бийнойнагæн – 17045 соми) фулдæр гъæуама ма уа.

– Уæ зæрдæбæл уин лæуун кæнун: июлæй фæстæмæ феддон æвæруни нæуæг фæткæ архайун райдæдта. Сæйраг нæуæгдзийнадæ барæ даруй «Нолон æфтуйаг»-мæ: нурæй фæстæмæ косунгъон ка нæй, уæхæн адæймагмæ зелуни æууæл мизди цохдзийнади ахсгиаг рæуонæбæл нимад æй айдагъдæр æвдист хеуондзийнади рæстæг. Хеуæнттæбæл нимад æнцæ лæг æма уосæ, цæуæт, ниййергутæ, æнсувæртæ, хуæртæ, бабатæ, нанатæ æма хъæболтæ (цæуæти цæуæт). Аци фæткæ хауй фиццаг къуари инвалидмæ, цуппаринсæй анземæй хестæр адæймагмæ, кенæ ба фæккæсуйнаг зæрондмæ зелуни рæстæг, – зæгъуй амунд хайади разамонæг Милдзихти Аслан.

Адæймагмæ ке зелунцæ, уобæл дзорæг гæгъæдитæ официалон уагæй исаразун гъæуй Социалон фонди. Хеуондзийнадæ бавдесунæн курдиадæбарветæги багъæудзæнæнцæ ЗАГС-и документтæ (райгурди æма къайадæ исаразуни туххæй æвдесæндартæ). Æфтуйаги цохдзийнади ахсгиаг анхоссæгтæ хигъдон рæстæгæй тæккæ минкъийдæр 10 мæйей дæргъи кæд архайдтонцæ, уæд гæнæн ес æма мизд нæ уодзæнæй нолон. Кæд амунд рæстæгæй минкъийдæр, уæдта тæккæ минкъийдæр мизди бæрцæ нимайунцæ хайадон уагæй.

Никкидæр ма еу æййивддзийнадæ барæ даруй цæрунади бунатмæ цæстдардмæ: адæймаг кæми адтæй, уæхæн бунæттæмæ гæсгæ ке барвистонцæ, нурæй фæстæмæ цæруни æууæл бæлвурд кæнунцæ еугур уæхæн курдиæттæмæ гæсгæ, регионти фæццæрунæн гъæугæ тæккæ минкъийдæр хæрзти гъæуагæдзийнадæ нæ нимайгæй. Фонд бæрæггæнæнти фулдæр хай исбæлвурд кæндзæнæй хуæдбарæй ведомствити еумæйаг (кустдæттæги, пособий, пенсий, цæрæнуатон-коммуналон лæггæдти фæдбæл льготитæ æма берæсувæллонгин бийнонти уагæвæрди туххæй) бафæрстити фæрци.

Бæрæггæнæнтæ автоматикон уагæй растбæл нимад кæд æрцæуонцæ, уæд документтæ нæ гъæунцæ. Æндæр уавæр кæд уа, уæд курдиадæ барветæг адæймагæн бафæдзæхсдзæнæнцæ цæрæнуат байхуæрсуни туххæй бадзурд, кенæ сувæллони скъолайæй, кенæ ба рæвдауæндонæй гæгъæди бавдесун.

Фарстатæ уæмæ кæд байзадæнцæ, уæд уин ес 8-800-100-00-01 телефонæй Уæрæсей Социалон фонди еумæйаг контакт центрмæ лæвар фæдздзоруни барæ (Уæрæсей Федераций Социалон фонди цæгатиристойнаг хайади кусти фæткæ: авдисæрæй цуппæрæнмæ – 9:00 сахатемæй 18:00 сахаттей уæнгæ, майрæнбони ба 9:00 сахатемæй 16:00 сахаттей æма 45 минути уæнгæ).