25 майя 2022

ЕВГЪУД ДЗАМАНТИ ФАРНӔ НИН ЕВГЪУДДЗИЙНАДӔ КУД НӔ ИСУА…

20.11.2021 | 14:08

Дзӕуӕгигъӕуи адтӕй историй ахургӕнгути ӕмбурд. Ӕргом хузи дзубанди кӕнгӕй, Дзӕуӕгигъӕуи администраций ахуради управлений хецау БАТӔРТИ Аслан педагогтӕн бахаста фӕндон историй ахургӕнгути Форум Цӕгат Иристони сӕйраг сахари исаразун.

 

– Форуми рӕстӕги кӕбӕл ӕрдзубанди кӕнӕн, еци фӕндӕнттӕ бахӕссӕн ес уӕлдӕр ӕмвӕзадӕмӕ. Историй предмети ахурадӕн ес устур гъомбӕладон-патриотон ахедундзийнадӕ. Куд зонӕн, уотемӕй историон архайгутӕ ирӕзгӕ фӕлтӕрӕн фӕнзуйнаг ӕнцӕ. Ахурадон пълани ӕма Иристони историй ахургӕнӕн киунугути медеси туххӕй уӕмӕ циуавӕр гъудитӕ исӕвзурдӕй, уой нӕ базонун фӕндуй, – загъта Батӕри-фурт.

Фембӕлди архайгутӕ Иристони историй ӕма ӕхсӕнадӕзонунади ахуради фӕдбӕл сӕмӕ исӕвзургӕ гъудитӕ раргом кодтонцӕ.

Зӕгъӕн, Джиоти Риммӕ бахаста музейтӕмӕ цӕунӕн скъоладзаутӕн абонемент бацӕттӕ кӕнуни фӕндӕ (ӕнӕ экспонатти хӕццӕ базонгӕй историй ахурадӕ лӕгъуз цӕуй). Устур ахургӕнӕн киунугутӕ кӕсун фӕсевӕди ке нӕ бафӕндӕуй, уой нимайгӕй, ӕригон ахургӕнгутӕ бахастонцӕ ахуради рӕстӕг цубурметражон роликтӕ ӕма кинонивтӕй пайда кӕнуни фӕндӕ.

Уомӕй уӕлдай, дзубанди цудӕй Иристони цӕрӕн бунӕттӕмӕ экскурситӕ аразунбӕл, Еумӕйаг паддзахадон фӕлварӕни нӕуӕгдзийнӕдтӕбӕл ӕма олимпиадитӕмӕ цӕттӕкӕнунадӕбӕл.

– Аци фембӕлд арӕзт ке ‘рцудӕй, е мин ӕхцӕуӕн ӕй. Нӕ ихӕс ӕй, еумӕйаг архайди фӕрци историон ахурадӕ уӕлдӕр къӕпхӕнмӕ исесун. Ӕригон ахургӕнгутӕ сӕ кустмӕ устур ӕргом ке ‘здахунцӕ, уой туххӕй си боз дӕн. Хаст ӕрцудӕй музейтӕмӕ цӕуни, экскурситӕ аразуни ӕма урокти фӕсте ӕртасӕн куст ӕнхӕст кӕнуни пайдайаг фӕндитӕ. Ахид Еумӕйаг паддзахадон фӕлварӕнмӕ цӕттӕ кӕнуни рӕстӕг аци гъуддӕгутӕ иронхуати байзайунцӕ.

Ӕмбурди архайгутӕ ке бахастонцӕ, еугур еци фӕндитӕ нимад ӕрцудӕнцӕ, – загъта 11-аг астӕуккаг скъолай историй ӕма ӕхсӕнадӕзонунади ахургӕнӕг Дедегкати Заремӕ.