24 майя 2022

«ФӔСЕВӔДИ ХӔЦЦӔ КУСТ ГЪӔУАМА ФӔЙЙАХЕДГӔДӔР КӔНАЙТӔ…»

11.03.2022 | 11:47

Цӕгат Иристони фӕсевӕдон еугӕндти разамонгути хӕццӕ фембалдӕй республики Сӕргълӕууӕг Сергей Меняйло. Дзубандигӕнгутӕ се ‘ргом раздахтонцӕ, нуртӕккӕ ци ӕндагон политикӕ исӕвзурдӕй, уомӕ. Сергей Меняйло дзуӕппитӕ равардта фӕсевӕди фарстатӕн.

– Мӕнмӕ гӕсгӕ, хуарз лӕдӕретӕ, нуртӕккӕ мах ци уавӕри ан, уой. Уӕрӕсе Украини нихмӕ нӕй, фал нацизм ӕма фашизм ка нӕ римӕхсуй, уони нихмӕ ӕрлӕудтӕй. Нигулӕн бӕститӕ исфӕндӕ кодтонцӕ Уӕрӕсе ниппурхӕ кӕнун. Гъуди кӕнун, Хонсар Иристон ӕма Абхазий ци уавӕртӕ исӕвзурдӕй, уони. Нуртӕккӕ баргунӕй нӕ загъд ку нӕ райгъустайдӕ, уӕд уӕззаудӕр фӕстеугути хӕццӕ исӕмбалдайанӕ. Айдагъ Донецк ӕма Лугански Адӕмон республикитӕ нӕ, фал еугур Уӕрӕсе дӕр тӕссаг бунати адтайдӕ. Гъӕуама кӕнӕн развӕлгъау къахдзӕфтӕ, ӕндӕр гӕнӕн нин нӕййес. Президент унаффӕ рахаста, мах ӕ хӕццӕ арази ан, – загъта республики Сӕргълӕууӕг.

Социалон хизти ци зулунмӕ хабӕрттӕ райвӕрунцӕ, Сергей Меняйло уомӕ раздахта уӕлдай ӕргом.

– Уӕрӕсей нихмӕ исаразтонцӕ агъазиау информацион тугъд, гъавунцӕ цӕргути ӕма, фиццагидӕр, ирӕзгӕ фӕлтӕри зундирахаст исӕмӕнтъери кӕнун. Уотемӕй адӕм рӕдуд унаффитӕмӕ рахездзӕнӕнцӕ, уомӕн ӕма, парахаттӕй ци хабӕрттӕ игъосунцӕ, уоми раст ӕма мӕнгӕ гъуддӕгутӕ зин равзарӕн ӕнцӕ. Гъӕуама еугур хабӕрттӕмӕ дӕр кӕсӕн критикон цӕстингасӕй, политикон гъуддӕгутӕ ӕвзарӕн, айдагъдӕр кӕбӕл ӕууӕндӕн, еци игъосункӕнуйнӕгтӕбӕл ӕнцойнӕ кӕнӕн, – бафеппайдта республики Сӕргълӕууӕг.

Фембӕлди архайгутӕмӕ фӕсседгӕй, Сергей Меняйло загъта, цӕмӕй фӕсевӕдон организацити куст фӕгъгъомусгиндӕр кӕнонцӕ:

– Нуртӕккӕ гъӕуама фӕсевӕди хӕццӕ куст фӕййахедгӕдӕр кӕнайтӕ, сумахӕй берӕ аразгӕ ‘й. Айтӕ лӕдӕргӕ, федар зундирахасти хӕццӕ адӕм, абони цаутӕ нӕ гъӕуама байеу кӕнонцӕ. Сӕрмагонд тугъдон операций ка архайуй, еци фӕсевӕди усхъитӕбӕл ӕрӕнцадӕй уӕззау уаргъ, фал ми ӕруагӕс кӕнуй, ӕнтӕстгинӕй ӕй ке исӕнхӕст кӕндзӕнӕнцӕ. Махӕн нӕ ихӕс ӕй республики ӕхсӕнадӕ байеу кӕнун ӕма нӕ фӕсевӕди фарс рахуӕцун.