Нӕ республики Национ музейи ӕрӕги байгон ӕй зундгонд хузӕгӕнӕг Каджати Вадим ӕма скульптор Кӕсӕбити Андрейи аййевадон кустити равдист.

Каджати Вадими исфӕлдистадӕ, зӕгъун ӕнгъезуй, цӕйбӕрцӕдӕр зундгонд ӕй нӕ газеткӕсгутӕн – нӕ газети ӕрмӕгутӕ исфӕлгонц кӕнуни туххӕй нӕмӕ рӕстӕгӕй-рӕстӕгмӕ мухургонд цудӕнцӕ ӕ конд хузтӕ. Цхинвали Колити Аксой номхӕссӕг аййевӕдти лицей каст фӕууогӕй, е 2002 анзи ахур кӕнунмӕ бацудӕй Санкт-Петербурги Репини номхӕссӕг хузӕкӕнуйнади, скульптури ӕма архитектури институтмӕ, кӕций каст фӕцӕй хъӕбӕр хуарз бӕрӕггӕнӕнти хӕццӕ. Ахур ба кодта монументалон хузӕкӕнуйнади ӕрмадзи А.А. Мыльникови разамундӕй.

Аци равдисти ӕвӕрд ӕнцӕ ӕ куститӕй сӕдемӕ хӕстӕг.

Хонсариристойнаг зундгонд скульптор Кӕсӕбити Андрей ба аразуй цӕмӕдессаг композицитӕ гъӕдӕ ӕма бронзӕй. Кӕд ӕма ӕ рӕстӕги каст фӕцӕй Цхинвали аййевадон училище хузӕкӕнуйнади хайадӕ, уӕддӕр нур инсӕй анземӕй фулдӕр архайуй гъӕдӕбӕл хузӕфтудтитӕ аразунбӕл. Аци равдисти ӕ куститӕй фӕууинӕн ес: къостӕ, синонтӕ, силгоймӕгти фӕлиндӕнтӕ, лолитӕ, сауӕнгӕ ма кӕрдти композици дӕр.

– Вадим ӕма Андрейи куститӕ ку фӕууидтон, уӕд уайтӕккӕдӕр мӕ зӕрдӕбӕл ӕрбалӕудтӕй зундгонд аййевадӕртасӕг Михаил Алпатови загъд: «Хузӕгӕнӕг – е ӕй ӕнӕгъӕнӕй дзиллӕ еу уодгоймаги медӕгӕ». Раст цума аци дууӕ адӕймагей туххӕй загъта, – уӕхӕн ӕй нӕ республики адӕмон хузӕгӕнӕг Дзбойти Михали гъуди аци равдисти фӕдбӕл. – Етӕ нин фӕууинун кодтонцӕ ӕцӕг аййевадӕ, исфӕлдистади ӕцӕг уӕлтӕмӕнадӕ.

ХӔМИЦАТИ Маринӕ.

Къартӕ исиста ШЕходанова Татьянӕ.