Адæмон еудзийнади Бон Цæгат Иристони ци аллихузон мадзæлттæй бæрæггонд æрцудæй, уонæй еу иссæй  дуйнеуон рохситауæн акци «Устур этнографион диктант».

Аци дзиллон мадзал арæзт ба æрцудæй нæ республики Национ музейи бæстихаййи. Архайдтонцæ си региони паддзахадон косæндæнтти æма национ-культурон еугæндти минæвæрттæ, культури косгутæ.

Национ культурити дуйнеуон фестиваль «Алтын Майдан-Алани»-й ка архайуй, еци хъазайнаг сувæллæнтти хæццæ еумæ Цæгат Иристони педагогон колледжи ансамбль «Æртхурон»-и солисттæ æмбурди архайгутæн равдистонцæ зæрдæмæдзæугæ концерт.

Диктанти ихæслæвæрдтæмæ хаудтæнцæ инсæй еумæйаг федералон фарстай. Мадзали архайгутæй æхсæрдæс анземæй уæлæмæ кæбæл цудæй, уонæн адтæй дæс æма инсæй фарстай: уонæй инсæй фарстай адтæнцæ еугур адæмтæн еумæйагдзийнæдти фæдбæл, иннæ дæс фарстай ба адтæнцæ регионалон хайбæл (гъома, бæсти алли регионæн дæр  æхе уавæртæмæ гæсгæ). Фарстатæн дзуæппитæ раттунæн лæвæрд цудæй фондз æма дууинсæй минутти.

– Еугуруæрæсеуон акцити туххæй хабар рагæй игъустон, фал си архайдтон фиццаг хатт. Ке зæгъун æй гъæуй, мæтæ кодтон, фал мæ уæддæр фæндадтæй мæ зонундзийнæдтæ исбæлвурд кæнун. Диктант нимайун пайдайаг дзиллон мадзалбæл, – загъта Цæгат Иристони паддзахадон филармоний аййевадон разамонæг Махъоти Ацæмæз.

Адæмихæттити гъуддæгути фæдбæл федералон агентадæ фадуæттæ кæмæн исаразта, еци «Устур этнографион диктант» Цæгат Иристони арæзт æрцудæй нæ республики ахурадæ æма науки, уæдта культури æма национ политики министрадти агъазæй.

Нæ уацхæссæг