25 февраля 2024

ФУДДЗИЙНАДÆЙ ТÆРСÆ ÆМА СИ ДÆХЕ ГЪÆУАЙ КÆНÆ!..

27.08.2022 | 17:12

Фæстаг рæстæг коронавирусæй сæйгити нимæдзæ нæуæгæй зингæ ке ирæзуй, уомæ гæсгæ ба, дзиллон хабархæссæг фæрæзнитæ куд игъосун кæнунцæ, уотемæй Уæрæсей æнæнездзийнадæ гъæуайкæнуйнади министр Михаил Мурашко бæсти цæргутæмæ фæдздзурдта, цæмæй æхсæнадон бунæтти нæуæгæй дарун райдайуонцæ маскитæ, уæдта искæнонцæ вакцинаци.

– Фæстаг дууæ мæйи дæргъи, гъулæггагæн, карз незæфтауæги гъомус нæуæгæй ирæзуй. Уæхæн уавæр хинцгæй, растдæр, æнæмæнгæ, уидæ æхсæнадон бунæтти маскитæ даруни фæткæмæ раздæхун æма нæуæг вакцинаций мадзали архайун, – загъта министр.

Коронавируси пандемийи нихмæ тохгæнæг федералон штаби бæрæггæнæнтæмæ гæсгæ, сæйгити нимæдзæ нæуæгæй зингæ ирæзун райдæдта июли-августи. Зæгъæн, августи райдайæни хæццæ рабаргæй, еу бонмæ ка рабæрæг уй, еци сæйгити нимæдзæ исирæзтæй 2,5 хатти. Дзуаппон рæстæг тæккæ бæрзонддæр бæрæггæнæн еу суктæмæ адтæй 28 мин сæйги (уæхæн нимæдзтæ фæстаг хатт бæрæггонд æрцудæнцæ мартъий). Уой хæццæ, 15 августмæ сæйгити нимæдзæ нæуæгæй еуцæйбæрцæдæр фæмминкъийæдр æй – суткæмæ рабæрæг æй 25 мин сæйгемæй минкъийдæр.

Коронавирусæй сæйгити нимæдзæ нæуæгæй ке ирæзуй, еци æууæл регионти санитарон службити ихæсгин кæнуй, цæмæй цæстдарди еуæй-еу мадзæлттæмæ раздæхонцæ. Зæгъæн, Бурятий санитарон служби унаффæй æхсæнадон транспорт æма æндæр дзиллон бунæтти раздæрау дарун гъæуй маскитæ. Петербург æма Алтайи администрацитæ маскитæ æнæмæнгæй даруни фæткæмæ нæма раздахтæнцæ, фал, уой хæццæ, бунæттон цæргутæн бафæдзахстонцæ, дзиллон бунæтти маскитæ дарун растдæр ке уодзæнæй, уой. Тæтæри республики профилон ведомствитæ ба фæндон бахастонцæ, цæмæй адæм маскитæ даронцæ, сæ кусти бунæтти уогæй дæр.

Ке зæгъун æй гъæуй, специалисттæ адæмæн амонунцæ ревакцинаци искæнун дæр. Аци амунддзийнадæ уæлдай ахсгиагдæр æй, аллихузон хроникон незтæ ке хъор кæнунцæ, еци адæмæн, уæдта хестæр кари минæвæрттæн. Сæрмагонд оперативон штаби бæрæггæнæнтæмæ гæсгæ, нуртæккæ бæсти цæргути дзиллон иммунитети бæрæггæнæн æй айдагъдæр 7,4 процентей бæрцæ.