Гæбути афонæ ке райдæдта, уомæ гæсгæ Цæгат Иристони «Роспотребнадзор» адæмæн сæ зæрдæбæл лæуун кæнуй, гæбутæ ци хуæцгæ незтæ расайунцæ, уони нихмæ профилактики мадзæлттæ.

Гæбутæ раги ке райгъал унцæ, уоми фудгин æнцæ æрдзи уавæртæ – гъар зумæг æма рагуалдзæги хорбæнттæ. Специалисттæ куд зæгъунцæ, уотемæй гæбутæ Уæрæсей искарз унцæ мартъий кæрони – апърели райдайæни. Æма аци анз дæр – уотæ. Фал медицинон косæндæнттæ игъосун кæнунцæ, адæймагбæл гæбу фæххуæцуни цаутæ, нуриуæнгæ еу æма дууæ ке нæ ’нцæ, уой.

– Мартъий райдайæнæй нæ республики косæндæнттæмæ ’рбацудæй, адæймагбæл гæбу ке фæххуæстæй, 11 уæхæн гъасти. Гæбути хузæ «Hyalomma» цæрунцæ будурти, гъæууат æма æдзæрæг рауæнти. Иннетæй аци гæбутæ ’нцæ ставддæр, уингæ дæр хуæздæр кæнунцæ, æма сæ цæмæй цæгъдунцæ, уæхæн мадзæлтти нихмæ дæр æнцæ федардæр. Иннæ гæбутæй æндæр нецæмæй хецæн кæнунцæ, – зæгъуй Управлений эпидемиологон цæстдарди хайади хецау Цæрикъати Мæдинæ.

Гæбути афони райдайæни хæццæ Управлений специалисттæ адæмæн амонунцæ сæ нихмæ æнхæсткæнуйнаг профилактикон мадзæлттæ.

Фиццагидæр, уæледарæс. Паркмæ, гъæдæмæ, æрдзи бунатмæ фæллад уадзунмæ цæугæй, искæнун гъæуй ирд уæледарæс, цæмæй ибæл гæбу бæрæг дара, уæдта, æхгæд æма даргъдустæ куд уа, уотæ. Хæлафи кæрæнттæ гъæуй ниццæвун цъинда кенæ къахидарæси. Сæрбæл – капюшон кенæ сæрбæттæн бабæттун.

Дуккаг, уæледарæсмæ базелун гъæуй, бауæри цъарæ багъæуай кæнунæн пайда кæнун гъæуй репеленттæй, гъома, химион бауæргъæдтæй.

Æртиккаг, æрдзи гъæбеси уогæй, алли 15-20 минутти дæр адæймаг гъæуама æхемæ æма æ уæледарæсмæ æркæса, уæлдайдæр æфцæкъуатæмæ æма, æнцъулдтæ кæми ес, уæхæн рауæнтæмæ.

Цуппæрæймаг, хе хæдзæрттæ, дачитæ кæмæн ес, етæ сæрмагонд организацити агъазæй гæбути нихмæ фæрæзнитæй сæ зæнхитæмæ гъæуама базелонцæ.

Гæбу куддæр фæххуæца, уотæ хе мадзæлттæй архайун нæ гъæуй, фал æвæстеуатæй гъæуй, хæстæгдæр ка уа, еци медицинон косæндонæмæ фæттагъд кæнун.

Нæ уацхæссæг