21 майя 2024

ГÆРЗЕФТОНГ ТУХТÆМÆ УАЛДЗИГОН ФÆДЗДЗУРД

27.05.2023 | 15:17

Дзæуæгигъæуи æфсæддон комиссар Бегизати Роберт куд фегъосун кодта, уотемæй уалдзигон фæдздзурд Уæрæсей æфсади рæнгъитæмæ райдæдта 1 апърелæй æма цæудзæнæй 15 июли уæнгæ.

Бегизи-фурти загъдмæ гæсгæ æфсади службæ кæнуни æмгъуд фæстæдæрмæ æргъæвд æрцæуй айдагъдæр еунæг хатт. Еци æмгъудæй пайда кæнун сæ бон æй, уæлдæр кенæ астæуккаг ахургæнæндæнтти ка ахур кæнуй, е ’нæнездзийнадæмæ гæсгæ æфсади службæ кæнун æ бон кæмæн нæй æма Уæрæсей хецауади унаффæмæ гæсгæ еци æмгъудтæмæ хауæг æндæр æригон нæлгоймæгтæн.

Æфсæддон комиссарадæй ДОСААФ-мæ шофербæл ахур кæнунмæ æрвист ка æрцæуа, етæ лæвар райсдзæнæнцæ еци дæсниадæ æма службæ кæндзæнæнцæ Хонсайраг федералон зилди. Æфсади рæнгъитæмæ фæдздзурди карæмæ ци фæсевæд хаунцæ, уонæй сæйгæ ка ’й, кенæ æ цæрæн бунат ка раййивта, кенæ æ профессионалон ахур аспирантури ка раидарддæр кодта, уони æнæмæнгæ æрбацæун гъæуй æфсæддон комиссарадмæ æма уоми исбæлвурд кæнун гъæуй сæ идарддæри уавæр æфсæддон службæмæ фæдздзурди фæдбæл. Уотæ си ка нæ бакæна,  етæ нимад æрцæудзæнæнцæ хе æфсæддон службæй тиллефгæнгутæбæл æма æййафдзæнæнцæ æфхуæрд закъонмæ гæсгæ.

Дзæуæгигъæуи æфсæддон комиссар федарæй зæрдæ байвардта, æмгъудмæ службæмæ ци фæсевæдмæ фæдздзоронцæ, етæ нæ архайдзæнæнцæ сæрмагонд æфсæддон операций, фал сæ служби рæстæг ахур кæндзæнæнцæ тугъдон дæсниадæбæл, службæ ба кæндзæнæнцæ ци æфсæддон хаймæ сæмæ фæдздзурдтонцæ, уоми: Идард Искæсæни, Уæрæсей астæуккаг регионти æма Хонсайраг федералон зилди.

Æфсæддон комиссар ма фегъосун кодта, зæгъгæ, æфсадмæ фæдздзоруни карæ седуни æмгъудтæ 18 анземæй 27 анзей уæнгæ æййивд æрцæудзæнæй æма уодзæнæй 21 анземæй 30 анзей уæнгæ. Нæуæг фæткæ æ хъаури бацæудзæнæй 2024 анзи январæй фæстæмæ. Уæд фæдздзурди кари райдайæн искæндзæнæнцæ  19 анземæй, анзи фæсте 20 анземæй æма уомæй фæстæмæ ба уодзæнæй 21 анземæй.