Куд нисангонд цæуй, уотемæй гъæуама хузæнонгонд æрцæуонцæ нæ республики æхсæрдæс ахурадон-гъомбæладон кустуати – цуппар æма инсæй скъолай, сувæллæнтти æхсæз рæвдауæндони æма астæуккаг профессионалон ахуради æхсæз объекти. Зæгъун гъæуй уой дæр, æма ахурадон кустуæттæ айдагъ цалцæггонд ке нæ цæунцæ, фал ма сæ ефтонг ке кæнунцæ нуриккон гъæугæ ахурадон ефтонггæрзтæй. Еугур еци гъуддæгутæн сæ сæйрагдæр нисанеуæг æй, цæмæй алли сувæллон дæр, кæми цæруй, уой нæ нимайгæй, гъæуама ахур кæна нуриккон зæрдæмæдзæугæ уавæрти.

Аци фарстати фæдбæл куститæ сæмæ куд æнхæстгонд цæунцæ, уой æрæги Ирæфи райони муниципалон исконди сæргълæууæги ихæстæ æнхæстгæнæг Махъоти Сослан исбæлвурд кодта æ кустадон балций рæстæг.

Толдзгуни еумæйаг ахурадон скъолай цалцæггæнæн куститæ æнхæстгонд цæунцæ национ проект «Фæсевæд æма сувæллæнттæ»-йи фæлгæти. Æнхæст ба сæ кæнуй æнæнхæстбаргин æхсæнадæ «Строймонтаж». Æма син нерæнгæ бал минкъий нæ бантæстæй: пъолтæ баййивтонцæ, къæридортæ æма, еумæйагæй ци хатæнтæй пайда кæнунцæ, уоми еугур инженерон хизтæ. Нуртæккæ ахурадон къæбинеттæ хуарунцæ, аййев сæ кæнунцæ. Хæстæгдæр рæстæг бавналдзæнæнцæ азгъунсти æндаг фарс цалцæг кæнунмæ.

Уæлдай æргом Махъоти Сослан раздахта сабийти æдасдзийнадæ æма исонибони фарстатæмæ – етæ ’нцæ абони ахсгиагдæр. Куститæ гъæуама æнхæстгонд æрцæуонцæ аци анзи 20 августмæ.

Идарддæр ма Махъой-фурт бабæрæг кодта, социалон ахедундзийнадæ кæмæн ес, уæхæн дууæ объекти – фельдшерон-акушерон  пункт æма гъæуккаг культури Хæдзарæ, сæ абони уавæр æма бунæттон цæргутæн лæггæдтæ ци уавæрти кæнунцæ, уой исбæрæг кæнуни туххæй.

Махъой-фурт ма ’ркастæй Лескени гъæуи бундоронæй цалцæггонд ци рæвдауæндонæ цæуй, уомæ дæр. Ами куститæ барæгонд æнцæ æнæнхæстбаргин æхсæнадæ «Кайзер»-бæл, æнхæстгонд цæунцæ национ проект «Бийнонтæ»-йи фæлгæти.

Проектмæ гæсгæ азгъунст, зæгъун æнгъезуй, нæуæгæй арæзт цæуй: специалисттæ ин æ сæр æрæхгæдтонцæ, баййивтонцæ инженерон хизтæ, уой хæццæ электрон тухæй æфсадæн, гъаргæнæн, дони хæццæ баст системитæ, баййивтонцæ дуæрттæ æма къæрæзгитæ. Нуртæккæ куститæ цæунцæ азгъунсти медæгæй: хуарунцæ тугуртæ, фæрстæ. Мадта ма рæсугъдгонд цæунцæ тургъæ æма рæвдауæндонæмæ ’рбацæуæнтæ. Еугур куститæ дæр арæзт цæунцæ афойнадæбæл, æмгъудтæй фæстегæй нæ изайунцæ.

Куд нисангонд цæуй, уотемæй бундорон цалцæг гъæуама фæууа аци анзи ноябри кæронмæ.

Еумæйагæй райсгæй, уотæ зæгъун дæр æнгъезуй, æма райони гъæути фæлгонц дæр хуæздæр æрдæмæ æййивд цæуй. Фæззиндтæй си, гъæути цæргутæ сæхуæдтæ ке равзарунцæ æма кæбæл исгъæлæс кæнунцæ, уæхæн нæуæг фæлладуадзæн бунæттæ. Национ проекттæ æма федералон программити бундорбæл арæзт цæунцæ, социалон ахедундзийнадæ кæмæн ес, уæхæн объекттæ. Уонæй дæр кæцидæрти бабæрæг кодта Махъой-фурт æ косæг балций рæстæг. Зæгъæн, Лескени цæугæдони сæрти хеди райарæзтадæ. Куститæ æнхæстгонд цæунцæ национ проект «Инфраструктурæ цардæн»-и фæлгæти. Аци объект ахсгиаг æй – уой сæрти цæуй, æ дæргъæ 88,5 километри кæмæн æй, еци над Дзæуæгигъæу-Æрæдон-Лескен.

Æнæнхæстбаргин æхсæнадæ «Асфальттрейд» нерæнгæ бал хеди фондз пролеттемæй исæвардта цуппар. Нуртæккæ идарддæр куст цæуй, ка ма байзадæй, еци хæйттæбæл, хедмæ дууердигæй бацæуæнтæбæл, уæдта блоктæ кæрæдзебæл бабæттунбæл архайунцæ.

Объект гъæуама исцæттæ уа 2027 анзи декабри райдайæнмæ. Проектмæ гæсгæ хед нæуæгæй арæзт цæуй: æййевунцæ ин, кæбæл лæууй, еци цæгиндзитæ, конструкцитæ, инженерон хизтæ, исæвæрдзæнæнцæ ибæл нуриккон уæлцъарæ æма ин æ алфамбулай банивæбæл кæндзæнæнцæ.

Нæуæг хед адæмæн «лæггадæ» кæндзæнæй дæсгай æнзтæ, республики цæргутæ æма иуазгутæ ибæл æдасæй æма æнæфидбилизæй цæудзæнæнцæ.

Еумæ райсгæй, кустадон балций рæстæг бæлвурдгонд æрцудæнцæ, райони гъæути хуæрзæрдæмæ æййивддзийнæдтæ гъæугæ уагæбæл ке цæунцæ, е. Сæ ахедундзийнадæ цæйбæрцæбæл бæрзонд æй, е ба бунæттон цæргутæй рæхги сæ цардиуаги зæрдæхцæуæн æййивддзийнæдтæй баруагæс уодзæнæй.

БУТАТИ Азæмæт