Æрæги Цæгат Иристони косæг балций адтæй Уæрæсей Федераций гъæууон хæдзаради министри хуæдæййевæг Оксанæ Лут. Нæ республики Сæргълæууæг Сергей Меняйлой хæццæ фембæли рæстæг æрдзубанди кодтонцæ зайæгойтæ æма фонсдаруни кустади, минкъий гъæууон амалгъонадæ, гъæууон туризм æма республики агропромышленон комплекси идарддæри ирæзти хæццæ баст æндæр ахсгиаг фарстатæбæл.

Сергей Меняйло æма Оксанæ Лут бабæрæг кодтонцæ Рахесфарси райони Хумæллæги гъæуи спортивон комплекси арæзтадæ – е æй, Цæгат Иристони паддзахадон программæ «Гъæууон фæзуæтти комплексон ирæзт»-и фæлгæти арæзт ка цæуй, еци агъазиау объекттæй еу. Куд нисангонд цæуй, уотемæй тагъд рæстæги гъæуама æ куст райдайа. Уоми гъæууон  фæсевæдæн хуарз равгитæ уодзæнæй спорти алли хузти къуæртти архайунæн.

Делегаций иуонгтæ Ирæфи райониуогæй, æркастæнцæ, Чиколай гъæууон спортивон æма æнæнездзийнадæ федаркæнуйнадон комплекси арæзтади куститæ куд цæунцæ, уомæ. Аци гъæуи ма фæуунтæбæл æй Фадзайти Арсени номбæл сувæллæнтти-фæсевæдон спортивон скъолай арæзтадæ.

Еци рауæнтæ бабæрæг кæнгæй, Оксанæ Лут уотæ загъта:

– Абони мах Цæгат Иристони цуппар районеми берæ объекттæ бабæрæг кодтан. Республики еугур районтæ дæр зæрдиагæй архайунцæ гъæууон фæзуæтти ирæзти проектти. Уæлдай цæмæдесагдæр мæмæ фæккастæй Хумæллæги спорткомплекси арæзтадæ. Е хуарз дæнцæн уодзæнæй иннæ гъæутæн дæр. Цуппар анземæ Цæгат Иристонæн федералон бюджетæй лæвæрд æрцудæй 3,8 миллиард соми. Е Цæгат Кавкази федералон зилди æй тæккæ фулдæр бæрæггæнæн. Иннæ анзмæ дæр нæмæ республикæй ес устур курдиадæ, берæ объекттæ бацудæнцæ проект «Нуриккон гъæууон фæзуати бакаст»-мæ. 2024 анзи бюджет аразгæй архайдзинан нæ финансон равналæнтæбæл æма фæййагъаз кæнунбæл.

Дзубанди ма цудæй уой фæдбæл дæр, æма республики ке ирæзуй гъæууон минкъий амалгъонадæ. 2023 анзи еци гъуддагæн паддзахадон агъази хузи радех кодтонцæ 333 миллион соми. Анзи фиццаг æмбеси бæрæггæнæнтæмæ гæсгæ, фæрæзнитæ райстонцæ 95 адæймаги хе хæдзарадæ исаразунмæ æма æндæр нисантæн.

Дигори райони Оксанæ Лут бабæрæг кодта Хæтæгти Артури фермерон хæдзарадæ. Е грант райста фонсдарæн ферми арæзтадæн. Кирови райони ба базонгæ ’й гъæууон кооператив «Ирдхуз балер»-и кусти хæццæ. Аци анз паддзахадон агъази фæрци кооператив балхæдта кæсæлгитæласæн æма уазалгæнæн нуриккон техникон фæрæзнитæ.

Гъæууонхæдзарадон къабази райрæзтбæл дзоргæй, Сергей Меняйло баханхæ кодта:

– Фермерон хæдзарæдтæ æма кооперативтæн агъаз, гъæууон фæзуæтти ирæзт нæ республикæн æнцæ æнæмæнгæ гъæугæ гъуддæгутæ. Нуриккон аккаг царди уавæртæ си аразгæй, нæ бон бауодзæнæй гъæутæй цæргути рацуд бауорамун, æригон фæлтæри гъæууон фæзуæтти цæрунмæ, уонæми идарддæри ирæзти гъуддæгути архайунмæ æма си  сæ карни хабæрттæ аразунмæ разæнгард кæнун. Еци гъуддаги нин устур агъазгæнæг æй Уæрæсей Федераций гъæууон хæдзаради министрадæ. Дууæ къуæрей размæ нин, гъæууон фæзуæтти ирæзти программи фæлгæти, радех кодтонцæ нæуæг фæрæзнитæ сувæллæнтти рæвдауæндонæ æма æртæ донуадзæни арæзтадемæн.