Æрæги нæ республики ци карз уарунтæ æма ехуард æрцудæнцæ, етæ уæлдай хъæбæр багъигæдардтонцæ Дзæуæгигъæуи, поселоктæ Хонсайраг æма Карцай, Октябригъæуи, Восход æма Ири цæргути. Æнæнгъæлæги уавæрти фæстеугутæ райеуварс кæнуни фæдбæл республикон къамиси æмбурди  нæ республики Сæргълæууæг Сергей Меняйло ведомствитæ æма муниципалитетти разамонгутæн байхæс кодта, цæмæй фидбилизи ка бахаудтæй, еци адæмæн фæййагъаз кæнуни туххæй æвæстеуатæй æма æнхæстæй арæзт æрцæуонцæ гъæугæ мадзæлттæ:

– Гъæуама бæлвурдгонд æрцæуа, ке есбонадæй цæйбæрцæ фæззæран æй æма алли бийнонтæн дæр ци финансон компенсаци радех кæнун æнгъезуй, уой. Зæгъæн, рæстæмбес нимадæй, уæхæн компенсацити бæрцæ уодзæнæй 50 минæй 100 мин сомей уæнгæ.

Уæхæн компенсацион феддонтæ адæмæн лæвæрд цæудзæнæнцæ Уæрæсей Хецауади унаффи бундорбæл.

Сергей Меняйло Дзæуæгигъæу æма Горæтгæрон райони администрацити сæргълæугутæн байхæс кодта, цæмæй исаразонцæ гъигæдардбаййафæг хæдзæртти номхигъд. Уой бундорбæл  ба гъæуама бацæттæ кæнонцæ, æрдзон фидбилиз ци материалон  зæрантæ æрхаста, уони бæрци туххæй лæмбунæг бæрæггæнæнтæ. Уой фæдбæл доргæй, загъта:

– Муниципалитетти разамонггутæ нуртæккæ, фиццаги-фиццагидæр, гъæуама исаразонцæ гъигæдардбаййафæг адæми реестр: хæдзари цал адæймаги цардæй, есбонадæ цæйбæрцæ гъигæдард баййафта æма уотæ идарддæр. Нæ рази гъæуама бæлвурд нимæдзтæ уа, кæци хæдзарæ цæйбæрцæ гъигæдард баййафта, уой фæдбæл.

Æ радзубандий Сергей Меняйло ведомствитæ æма муниципалитетти разамонгутæн еума хатт бафæдзахста, цæмæй фидбилизи фæстеугутæ еуварс кæнуни куститæ куд æнхæстгонд цæунцæ, уомæ уа бæрнон еудадзугон цæстдард.