Уæрæсей Хецауади Сæрдар Михаил Мишустин ци стратегион æмбурд исаразта, уоми равзурстонцæ, вице-премьертæ федералон зилдтитæмæ сæ цæстæ куд дарунцæ, уой. Мадзали архайдта Цæгат Иристони Сæргълæууæг Сергей Меняйло.

Федералон зилдтитæмæ цæстæ даруни институт исаразтонцæ 2021 анзи июли мæйи. Æ нисан æй регионти царди хуæрзгъæдæдзийнадæ уæлдæр æмвæзадæмæ исесун æма социалон-экономикон ирæзт фæттагъддæр кæнун.

Михаил Мишустин куд загъта, уотемæй нæ бæсти субъектти ирæзунцæ æнæбюджетон инвестицитæ – 2023 анзи кæронмæ сæ бæрцæ адтæй 9 триллион сомемæй фулдæр. Фæстаг дууæ анзи æма æрдæгмæ арæзт æрцудæй 230 мин косæн бунати, товартæ уагъд æма лæггæдтæ æнхæстгонд æрцудæй æнхæсткæнуйнади 6,5 миллиард сомей аргъ.

Нуртæккæ регионти кураторти активон агъазæй царди уагъд цæунцæ 357 хъæппæреси, 33 проекти нуриуæнгæ арæзт æнцæ. Еци нимæдзти фæсте, Мишустин куд загъта, уотемæй ес, адæмæн æма кустади къабæзти ирæзтæн гъæугæ бæлвурд бæрæггæнæнтæ, объекттæ æма унаффитæ. Сессий ци проектти кой кодтонцæ, уони ’хсæн загътонцæ Цæгат Иристони Дзæуæгигъæуи аэропорти нæуæг аэровагзалон комплекси туххæй дæр, æ нуриккон инфраструктурæй нур анзæй фулдæр пайда кæнунцæ бæлццæнттæ æма бунæттон цæргутæ.