28 майя 2022

ГЪУДДАГИ БАЦУДТӔ, УӔД ДЗУАПП ДӔТТУНГЪОН ЛӔГИГЪӔДГУНӔЙ УО!..

13.08.2021 | 17:47

Ӕма бабӕй куд нӕ ӕримисӕн нӕ рагфидтӕлти зундамонӕг фӕдзӕхститӕ. Уонӕй нин байзадӕй мӕнӕ ауӕхӕн загъд: «Гъуддаги ку бацӕуай, уӕд си лӕгигъӕдгунӕй архайӕ – рӕуӕнттӕ агорун тиллефтӕ кӕнун ба хъор ӕма къулумпий хуасӕ ‘нцӕ!..» Ӕцӕгӕйдӕр уотӕ ке ‘й, уой нӕ алфамбулай хъӕбӕр берӕ рауӕнти ку уинӕн! Беретӕ бӕрнон бунатмӕ хицӕ кӕнгӕй, бадгӕ дӕр си бӕргӕ ‘ркӕнунцӕ, фал си гъӕугӕ хузи архайунгъон ба ӕгириддӕр не ‘сунцӕ – кенӕ арӕхсгӕ нӕ фӕккӕнунцӕ, кенӕ ба сӕ фӕндгӕ дӕр нӕ фӕккӕнуй, уомӕн ӕма, ӕвӕдзи, никки бӕрзонддӕр бунатмӕ фенгъӕлмӕ кӕсунцӕ.

Нӕ абони цардиуаги берӕ ӕнӕмӕнгӕ райаразуйнаг гъуддӕгутӕ дӕр гъе уомӕ гӕсгӕ сӕ берӕрӕстӕгон ӕдзӕллаг уавӕртӕй ратӕлфунгъон нӕ ‘нцӕ, уой фудӕй ба нӕ еугурдӕр ӕвзарӕн тухстдзийнӕдтӕ.

Уӕхӕн «цийфӕндидзийнӕдтӕ» нӕмӕ ӕгӕр ке исберӕ ‘нцӕ ӕма нӕ размӕцуди ӕгӕр ке хъор кӕнунцӕ, раст гъе уой фӕдбӕл нӕ республики Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей Меняйло хъӕбӕр карзӕй дзурдта ӕрӕги ци урух ӕмбурд исаразта ӕма си сӕрдареуӕг кодта, уоми. Дзубанди ба си цудӕй республики аллибони царди берӕ ахсгиаг фарстати фӕдбӕл.

Цӕгат Иристони Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей Меняйлой разамундӕй хецауади Хӕдзари ци урух ӕмбурд адтӕй, уой архайгутӕ ӕрдзурдтонцӕ республики аллибони царди ахсгиаг фарстатӕбӕл.

Республики Сӕргълӕууӕг ведомствити разамонгути ӕргом нӕуӕгӕй раздахта зӕнхи хӕйттӕ ӕма ӕндӕр паддзахадон есбойнади инвентаризаций фарстатӕмӕ. Уобӕл дзоргӕй, Сергей Меняйло профилон министрадти разамонгутӕн байхӕс кодта, цӕмӕй исбӕлвурд кӕнонцӕ, апърели мӕйи Дзӕуӕгигъӕуи администраци зӕнхи хӕйтти аренди фӕдбӕл ци бадзурдтӕ исфедар кодта, уони закъонадон бундор.

– Уӕ зӕрдӕбӕл уин лӕуун кӕнун, аци анз 20 апърели ци унаффӕ исфедар кодтан, уомӕ гӕсгӕ рӕстӕгмӕ уорӕд ӕрцудӕй зӕнхи хӕйттӕ аренди дӕттуни куст. Фал куд исбӕрӕг ӕй, уотемӕй еци ӕмгъудӕй фӕстӕдӕр федаргонд ӕрцудӕнцӕ зӕнхи хӕйтти аренди туххӕй бадзурдтӕ. Ӕма нин нур дзорунцӕ, еци бадзурдтӕ, дан, 2015 ӕма 2016 ӕнзти бафинстан. Паддзахадон есбойнадӕ ӕма зӕнхи рахастдзийнӕдти министрадӕ ӕма иннӕ ведомствитӕн ихӕс кӕнун, цӕмӕй исбӕлвурд кӕнонцӕ, 20 апърели ци бадзурдтӕ федаргонд ӕрцудӕй, уони барадон ӕнаййепдзийнадӕ. Уӕдта ӕркӕсун гъӕуй, еци зӕнхитӕ еу категорийӕй иннемӕ куд раййивтонцӕ, (гъома, раздӕр арӕзтадон архайд кӕнӕн кӕми нӕ адтӕй, еци зӕнхи хайбӕл нур исфӕндӕ кодтонцӕ бӕстихӕйттӕ ӕрӕвӕрун), уомӕ дӕр, – бафеппайдта республики разамонӕг.

Цӕгат Иристони сӕйраг сахари уавӕрбӕл дзоргӕй, Сергей Меняйло ӕ гъудитӕ загъта нӕуӕг объектти арӕзтади фӕтки туххӕй дӕр.

– Ами тъӕпп, уоми тъӕпп арӕзтӕдтӕн нурӕй фӕстӕмӕ гъӕуама бунат мабал уа. Еугур фӕзуӕттӕ дӕр идарддӕр гъӕуама ирӕзонцӕ комплексон пъланти бундорбӕл – гъома, еугур арӕзтадон объекттӕ дӕр гъӕуама уонцӕ кӕрӕдзебӕл баст. Еугур арӕзтадон архайд дӕр гъӕуама дзуапп дӕтта закъонӕвӕрунади домӕнтӕн. Уой хӕццӕ ӕ тухи уодзӕнӕй уӕхӕн домӕн – еугур объектти фарсмӕ дӕр рагацау гъӕуама нисангонд уа социалон инфраструктури арӕзтадӕ дӕр, – загъта Сергей Меняйло.

Ӕмбурди архайгутӕ ӕркастӕнцӕ республики цӕрӕнуатон-коммуналон хӕдзаради комплекси  фарстатӕмӕ дӕр. Зӕгъӕн, сӕрмагонд ӕргом ‘здӕхт ӕрцудӕй канализаци ӕма донуадзӕн хӕтӕлти райарӕзтмӕ. Уой фӕдбӕл ӕмбурди радзубанди кодта цӕрӕнуатон-коммуналон хӕдзаради, артаг ӕма энергетики министри ихӕстӕ рӕстӕгмӕ ӕнхӕстгӕнӕг Тамати Майрӕн.

Аци къари ци берæуæладзугон арæзтадæ уинетæ, е конд æрцудæй Дзæуæгигъæуи Хетæгкати Къостай номбæл фæлладуадзæн æма культури парки бæрæгастæу. Ами ин æгириддæр уæн нæййес, зæгъгæ, æ нихмæдзоргутæ кæд хъæбæр берæ адтæй, уæддæр, уинетæ ‘й, игъосæг сæмæ нæ фæцæй… Нур æй, зæгъунцæ, фехалуйнаг æнцæ…

Профилон ведомстви разамонӕги дзубандимӕ гӕсгӕ, аци къабази еугур нисангонд куститӕ дӕр пълани бундорбӕл ӕнхӕстгонд цӕунцӕ. Зӕгъӕн, Елбаевой гъӕуи цӕргутӕмӕ ниуазуни дон бахъӕртдзӕнӕй 31 августмӕ, мӕйи кӕронмӕ ӕнӕ донӕй нӕбал уодзӕнӕнцӕ Цӕликки цӕргутӕ дӕр, Заманхъули ба донуадзӕн нӕуӕг хӕтӕлтӕ бахъӕртдзӕнӕнцӕ сентябри кӕронмӕ.

Фарстайӕн хатдзӕгтӕ кӕнгӕй, Сергей Меняйло куд бафеппайдта, уотемӕй еугур куститӕ дӕр гъӕуама ӕнхӕстгонд ӕрцӕуонцӕ ӕнаййеппӕй ӕма афойнадӕбӕл.

Республики пандемий хӕццӕ баст исӕвзургӕ уавӕри туххӕй адтӕй ӕ радзубанди ӕнӕнездзийнадӕ гъӕуайкӕнуйнади министри ихӕстӕ рӕстӕгмӕ ӕнхӕстгӕнӕг Тебиати Сосланӕн.

Исӕвзургӕ уавӕри фӕдбӕл профилон министради разамундӕн бӕлвурд амунддзийнӕдтӕ ратгӕй, Сергей Меняйло сӕрмагондӕй ӕрдзурдта Тӕрхонадон-медикон экспертизи республикон бюрой архайди туххӕй дӕр. Министрадӕн ихӕсгонд ӕрцудӕй, цӕмӕй бюрой разамонӕги бунатмӕ байагоронцӕ нӕуӕг адӕймаг.

– Тӕрхонадон-медикон экспертизи бюрой разамонӕги бунатмӕ гъӕуй нӕуӕг специалист. Нуртӕккӕ бюрой сӕргъи ка лӕууй, еци адӕймаг, куд лӕдӕрун, уотемӕй уӕлӕнгай цӕстӕй кӕсуй ӕ кустмӕ. Еци косӕндонӕ ку бабӕрӕг кодтон ӕма ку ракурдтон, хецауи мин фӕууинун кӕнетӕ, зӕгъгӕ, уӕд мин балӕдӕрун кодтонцӕ,  ӕ фӕллад уадзунмӕ ке рандӕй, уой. Уӕдӕй абони уӕнгӕ мӕнмӕ неци хабар ес, еци фембӕлди бюрой разамонгутӕн ци амундзийнӕдтӕ равардтон, етӕ куд ӕнхӕстгонд цӕунцӕ, уой фӕдбӕл, – бафеппайдта Сергей Меняйло.

Ӕмбурди архайгутӕ ӕркастӕнцӕ ӕндӕр фарстатӕмӕ дӕр.