Аци къарӕмӕ кӕсгӕй, ӕруагӕс дӕр ни нӕ кӕнуй, нӕ кадгиндӕр хестӕртӕй еу, Гулути Темурхъани фурт Хизир не ’хсӕн ке нӕбал ӕй, е. Ӕрӕги, евгъуд сабати ин адтӕй ӕ рамӕлӕти дууинсӕй боней кӕндӕ. Ӕма уоми ци берӕ дзиллӕ бамбурд ӕй, уонӕй еу хъӕбӕр хъонцгӕнгӕй нийнӕфтӕй: «Гулути устур тургъӕмӕ тӕфирфӕс кӕнунмӕ ку бацудтӕн, уӕд мӕмӕ уотӕ кастӕй, цума нуртӕккӕ мӕ размӕ иннӕ хӕттити хузӕн рацӕудзӕнӕй Хизир ӕхуӕдӕг…  Гъе уоййасӕбӕл хеуон мин адтӕй ӕма, ци ‘рцудӕй, е ’носон дуйнемӕ ке банӕхстӕр ӕй, уой бӕргӕ лӕдӕрун, уӕддӕр зӕрдӕ ба нӕ арази кӕнуй, цардӕгас ке нӕбал ӕй, уобӕл…»

Уотӕ ма, ӕвӕдзи, гъуди кӕнунцӕ, Хизири ка зудта, етӕ. Зонгӕ ба ’й беретӕ кодтонцӕ айдагъ Иристони нӕ, фал ӕнӕгъӕнӕ Цӕгат Кавкази дӕр ӕма Уӕрӕсей берӕ рауӕнти дӕр. Зудтонцӕ ’й ӕма син хеуон адтӕй куд нӕ Фидибӕсти ӕма нӕ адӕми сӕрбӕлтау ӕновудӕй хъиамӕтгӕнӕг, куд уодикондӕй кӕдзос ӕма раст, зӕрдхӕлар адӕймаг, хуӕрзӕгъдау хестӕр… Берӕ арфиаг хабӕрттӕй ӕримисун ӕнгъезуй Гулути Хизири рохс ном, ӕма нӕ газети равгитӕ куд амонунцӕ, уомӕ гӕсгӕ бал абони мухур кӕнӕн еу ӕрмӕг . Лӕдӕрӕн ӕй, е фагӕ нӕй ӕма, куд гӕнӕн ма нин уа, уомӕ гӕсгӕ фӕстӕдӕр ӕндӕр ӕрмӕгутӕ дӕр мухур кӕндзинан.