«БОЛÆМÆРГЪÆ»-ЙИ ЗÆЛТÆ ИССÆНЦÆ НИФСДÆТТÆГ

Цалдæр анзей размæ Республикæ Хонсар Иристони Минæвайрадæ Уæрæсей Федераций бавдиста арфиаг хъæппæрес – арæзт æрцудæй Æхсæндуйнеуон литературон преми «Болæмæргъæ». Ес си, уруссаг æвзагбæл уадзимистæ ка финсуй, уони исфæлдистадæн исаргъ кæнуни фæдбæл сæрмагонд номинаци дæр.

Æма нур дæр Минæвайрадæ æма преми «Болæмæргъæ»-йи совет игъосун кæнунцæ, 2022 анзи преми райсуни фæдбæл авторти куститæ есун ке райдæдтонцæ, уой.

Æркастмæ бадæттæн ес куд комкоммæ ирон æвзагбæл финст уадзимистæ, уотæ æндæр æвзæгтæбæл финст уадзимисти тæлмацтæ.

Конкурсон къамисмæ бадæттæн ес романтæ, уацаутæ, радзурдтæ, кенæ уæхæн æма æндæр уадзимисти æмбурдгæндтæ, уæдта документалон прозæ æма мемуартæ.

Зæгъун гъæуй уой дæр, æма автортæ кæми цæрунцæ æма уадзимистæ мухургонд кæми æрцудæнцæ, еци æууæл преми райсунæн æгириддæр гæрæнтæ не ‘вæруй. Конкурсон къамиси унаффæй литературон ериси «Болæмæргъæ»-йи уæлахезонтæ хуарзæнхæгонд æрцæудзæнæнцæ:

Фиццаг преми – 60 мин соми;

Дуккаг преми – 40 мин соми;

Æртиккаг преми – 30 мин соми.

Конкурси архайуни фадуат ес, 14 анземæй 41 анзей уæнгæ кæбæл цæуй, уæдта ирон æвзагбæл финсунмæ дæсни ка ‘й, уонæн.

Преми райсуни фæдбæл еугур æрмæгутæ дæр бадæттæн ес 2022 анзи 30 декабри уæнгæ.

Премий туххæй уагæвæрд лæмбунæгдæр базонæн ес Республикæ Хонсар Иристони Минæвайради официалон сайти. Уомæй уæлдай, еугур фарстатæ дæр бадæттæн ес премий секретариатмæ уæхæн телефонæй: +7(495) 644-27-57.