Уæрæсей Президент Владимир Путин Кремли кадгин уавæри равардта бæрзонд паддзахадон хуæрзеугутæ, Райгурæн бæсти сæрбæлтау æ цард ка иснивонд кодтаа, еци афицерти бийнойнæгтæ æма ниййергутæн.

Президенти къохæй «Сугъзæрийнæ Стъалу» райстонцæ сæрмагонд æфсæддон операций ка фæммард æй, Уæрæсей Бæгъатæр гвардий лейтенант Мæрзойти Василийи ниййергутæ Мæрзойти Аркадий æма Маргаритæ. Владимир Путин сæ хæццæ ку дзубанди кодта, уæд бæгъатæри фидæ загъта:

– Æз сæрустур дæн, нæ бийнонти æртæ фæлтæрей афицертæ Фидибæстæн кадгинæй ке службæ кæнунцæ, уомæй. Нæ фуртбæл æвæрд æрцудæй æ фронтовик фиди фидæ Василийи ном. Е 1941 анзи æфсæддон училище фæууни фæсте гъæуай кодта Мæску, уой фæсте нæудæсанздзудæй, фестæгæфсади батальони командæгæнæг уогæй, бæгъатæрæй тох кодта Сталингради бунмæ. Нæ биццеу нæбал æй, фал цард бавдиста, раст гъомбæладæ ин ке равардтан, уой», – загъта Аркадий, Василийи фидæ инæлар-лейтенант, Хонсайраг Æфсæддон зилди 18-аг æфсади командæгæнæг.

Не ’мзæнхон, æригон гвардий лейтенант Мæрзойти Василий, æвдæймаг десантон-хъазауатонæй æмпурсæг 108-аг парашютон-десантон полкки æсгаргути роти  командæгæнæг, Запорожьей облæсти бæгъатæрæй фæммард æй 2025 анзи 17 октябри, тугъдон ихæстæ æнхæст кæнгæй.

Василий 2025 анзи фæззæги æ тугъдонти хæццæ, æсгаргæ æма размæ ’мпурсгæй, знаги æхсæз æнцайæн (опорный) пункти райстонцæ, искунæг кодтонцæ 23 националисти, еуей райстонцæ уацари, басугътонцæ фондз квадроцикли æма дууæ пикапи.

2025 анзи 15 октябри гвардий лейтенанти дæлхайади   ахæст бунатбæл знаги авиабомбæ исæмбалдæй. Афицер уæззау цæф фæцæй, райста контузи, фал ма æ бон бацæй æ тугъдонтæй дууей æдас бунатмæ рахæссун, фæстæмæ ку раздахтæй, уотæ укрофашисттæ дуккаг цæф никкодтонцæ авиабомбæй, æма Василий азгъунсти ихæлддзæгти буни фæцæй. Æнæгъæнæ суткæ десантниктæ еуварс кодтонцæ ихæлддзæгтæ, сæ зæрдæ дардтонцæ, сæ командæгæнæг æгас æй, уобæл, фал æй мардæй иссирдтонцæ…

Уæрсей Бæгъатæр, гвардий лейтенант Мæрзойти Василий 2025 анзи 19 октябри кади хæццæ æвæрд æрцудæй Дзæуæгигъæуи Кади аллейи.