07 августа 2022

ХАЛӔНТТӔ ХАЛӔНТТӔМӔ ТӔХУНЦӔ?..

30.06.2022 | 15:29

Валерий Карасеви конд хузæ.

Украини сæрмагонд æфсæддон операци куддæр райдæдта, уотæ Уæрæсейæй уайтæккæдæр фæлледзæги æнцæ, нæ дзиллæ æнæуойдæр кæмæй исгъигæ ‘нцæ, еци «игъустгонд» адæймæгутæй кадæртæ. Нæ зонæн, цæй фудæй, ци сæ фесхъæтæг кодта – ами син æгæр хуарз дæр ма адтæй, неке сæ нецæмæй хъор кодта, е нæ, фал ма сæ æгæр боц дæр кодтонцæ. Сæ нуриккон фусунтæй, абони берæ аллихузон фудмиутæ ка аразуй æма уæрæсейаг хъозæнттæй ке багъудæй, уонæй кенæ естæмæйти ихæсгин æнцæ, кенæ ба син етæ цидæр хиццагдæрдзийнæдтæй зæрдитæ байвардтонцæ. Æма си етæ ба фусуйнагæн, æвæдзи, илгъагдзийнадæ байагурдтонцæ, уой федунбæл дæр æнæзийнадæ, растдæр зæгъгæй ба, æнæфсæрмийæй исарази ‘нцæ – æма æзинæ дæр ма æ билицъæрттæ ка хуардта, Уæрæсе син цæйбæрцæбæл хъазар æй, уодуæлдайæй ибæл куд æновуд æнцæ, уæхæн æма æндæр «зæрдтагон» сомитæ кæнунæй, етæ ибæл абони ба сæ фæсарæйнаг æстойнитæй дзæгъæл куйти рæйдæй сæ сæтæ калунцæ сæ кæддæри «райгурæн» бæстæбæл, нециуавæр цъифкалæнтæй ауæрдунцæ, уотемæй ибæл алли «азуймæгтæ» имисунцæ…

Уотæ нæмæ кæсуй, æма фæсарæнти нин хуæздæр уодзæнæй, зæгъгæ, уой зæрдтæй абони Уæрæсейæй ка фæлледзæги æй, етæ сæ бæлдитæй фæффудевгед уогæй, багъавдзæнæнцæ фæстæмæ æрбаздæхун. Фал, баруагæс уи уæд, раздæри хузæн зæрдифæндон уавæртæ нæбал уодзæнæй. Уой туххæй зундгонд режиссер, Уæрæсей адæмон артист Владимир Бортко раст загъта: «Может быть, потом они вернуться, но, думаю, что в прежнем амплуа им будет выступать уже достаточно сложно…»

Уогæ нин еци фæлледзгути карнæ уоййасæбæл сагъæссаг цæмæн уа – рахъутти æнцæ æма сæ барæ сæхе уæд. Сагъæссагдæр гъæуама е уа, æма нæ еугурадæмон есбонадæбæл хæлæф кæнуни фæрци ка рабонгин æй, етæ се ‘хцатæ фæсарæнти банкти нерæнгæ дæр ма æфснайунцæ, кадæртæ ба сæ хæццæ фæллигъдæнцæ Уæрæсейæй.

Еугур еци фарстатæбæл минкъий дзубанди нæ цæуй дзиллон хабархæссæг фæрæзнити. Уонæбæл рафæлгæст мухур кæнæн нæ газети абониккон номери 6-7-аг фæрстæбæл.