Ӕ  РОХС НОМ НӔ ИРИСТОНИ ДЗИЛЛИ ЗӔРДИТИ ЦӔРДЗӔНӔЙ ӔНОСТИ…

Цӕгат Иристонбӕл ӕрцудӕй уӕззау зиан. Цуппаринсӕйанздзудӕй ӕ уӕлзӕнхон цардӕй рахецӕн ӕй национ культури игъустгонд архайӕг, Иристони адӕмон поэт, критик, драматург, тӕлмацгӕнӕг ӕма публицист Ходи Хазбийи фурт Камал.

Ходи Камал райгурдӕй 1941 анзи 26 январи Бӕтӕхъойгъӕуи. 1970 анзи каст фӕцӕй Мӕскуй М. Горькийи номбӕл литературон институт. Ӕмгуст кодта районти газетти хӕццӕ, ахӕста телеуинунади цӕгатиристойнаг студий редактори бунат. Дӕс анземӕй фулдӕр разамунд лӕвардта журнал «Мах дуг»-и критикӕ ӕма публицистики хайадӕн, куста киунугути рауагъдадӕ «Ир»-и редакторӕй, фӕстӕдӕр ба – сӕйраг редакторӕй.

Камал 1985 анзи ӕрлӕудтӕй Цӕгат Иристони паддзахадон драмон театри сӕргъи, еци – еу рӕстӕг альманах «Литературная Осетия»-йи бӕрнон секретарӕй косгӕй.

Ходи Камал 1989-1990 ӕнзти куста Цӕгат Иристони АССР-йи рауагъдӕтти, полиграфи ӕма киунугутӕй базаради паддзахадон комитети сӕрдарӕй. 1990 анзи ӕрлӕудтӕй Цӕгат Иристони финсгути Цӕдеси сӕргъи.

Камал адтӕй нуриккон ирон литератури игъустгонддӕр поэттӕй еу, ӕ уадзимистӕ ба бӕрӕг дардтонцӕ сӕрмагонд исфӕлдистадон хуӕдхузӕдзийнадӕй.

Ходи Камал рауагъта дӕс поэтикон ӕмбурдгондемӕй фулдӕр. Е ‘сфӕлдистади ахсгиаг бунат ахӕста аййевадон тӕлмац. Камал маддӕлон ӕвзагмӕ раййивта Бокачойи, Гейнейи, Лопе де Вегайи, Шиллери, Плещееви, Исаеви, Островский ӕма дуйнеуон литератури берӕ ӕндӕр классикти уадзимистӕ.

Ходи Камал адтӕй Хетӕгкати Къостай номбӕл паддзахадон премий ӕма национ литературон преми «Нарти фӕткъу»-йи лауреат. Е ниффинста Республикӕ Цӕгат Иристон-Аланий Гимни текст.

Ходи Камалӕн 2019 анзи исаккаг кодтонцӕ уӕлдӕр хуӕрзеуӕг – Иристони Намуси орден.

Ирон литератури хӕзнатӕ Ходи Хазбийи фурт Камали медесгун аййевадон уадзимистӕй исфедудтонцӕ. Иристони искурдиадӕгин финсӕг ӕма патриоти рохс ном ӕносмӕ нӕ зӕрдити байзайдзӕнӕй.

Сергей МЕНЯЙЛО,

Алексей МАЧНЕВ,

ТУСКЪАТИ Таймораз.

 

Ходи Камал ӕ уӕлзӕнхон цардӕй рахецӕн ӕй, нӕ дзиллӕ Устур Фидибӕстон тугъди райдайӕни цуппаринсӕй анзи ци бӕнтти бӕрӕг кӕнунцӕ, уӕд… Еци ӕверхъау тугъд ӕ ӕгӕрон берӕ фудракӕндтитӕй зӕрдихӕлд фӕккодта Камали зӕрдӕ дӕр ӕ сабийдоги, ӕ карнӕбӕл ин ниууагъта ӕ додойаг фӕд – ӕ фидӕ Хазби тугъдмӕ рандӕ ‘й ӕма си ӕ фидиуӕзӕгбӕл нӕбал исӕмбалдӕй, фӕммард ӕй Райгурӕн бӕсти сӕрбӕлтау немуцаг-фашистон ӕрдонгти нихмӕ тохи… Камалӕн ӕ зӕрдрист не ‘рнидӕн ӕй ӕ царди фӕстаг бони уӕнгӕ дӕр, айдагъдӕр ма исфӕразидӕ ӕ хъонц е ‘мдзӕвгити зӕгъун… Уонӕй кӕцидӕрти ӕримисӕн мах дӕр абони, Камали е ‘носон дуйнемӕ, е ‘дзард тугъдон фиди размӕ фӕндараст кӕнгӕй.

---

 МЫСӔН НЫХАС

Мӕ фыд Хазби уыди фондз ӕфсымӕры хистӕр. 1941 анзи ацыдысты Фыдыбӕстӕйы Стыр хӕстмӕ. Ӕртӕйӕ дзы фӕмард сты: Хазби, Валодя, Бибола… Агыса ӕма ма дзы Дзаххотт Ирыстонмӕ удӕгасӕй сыздӕхтысты, фӕлӕ уыдон дӕр абон уӕлӕуыл нал сты.

Ацы рӕнхъытӕй арын мӕ фыд ӕма йӕ цыппар ӕфсымӕры рухс ном.

I

Кӕд топпы кӕсӕн ӕмӕ карды бырынкъӕй

Ирыстонӕн агуырдтат амонд,

О, рухсы цӕринаг фыдӕлтӕ!..

II

Бӕтӕхъойыхъӕуы ӕмдзӕхгӕр къуылдымтӕй

Цъӕхартуадзӕг дунейы судзгӕ фӕтӕнтӕм

Бӕрзонд удты намыс, бӕрзонд тырысайау,

Уӕ сӕрмӕ гуыргуыргӕнгӕ хастат.

Сымах

Адзал ӕма царды ӕрӕмных

Нӕ бафтыдта тасы.

Уӕууӕй!

Зындоны дӕлдзиныг цъӕссытӕй,

Гуымир тыхы абухгӕ хъоргъӕй

Куы рӕдывта зӕххы уӕлцъармӕ

Ныллӕг удты сау фыдӕх;

Арв

Куынӕуал ӕууӕндыди Зӕххыл;

Уӕлӕрвтыл йӕ зӕрдӕ куы сивта зӕххон лӕг;

Идӕдз ӕмӕ сидзӕргӕс устыты хъарӕг

Куы ныббадт Ирыстоны кӕмтты цъӕх мигъау;

Хангуассӕйы цӕссыг

Куы згъӕлди бӕгъатыр

                       Ирыстоны тохвӕлтӕрд риуыл –

Гъеуӕд,

Мӕ зынгхуыст фыдӕлтӕ,

Сымах

Уӕ тугӕрхӕм хъӕлӕстӕй

Самыдтат зарӕг –

Сӕрибары зарӕг.

Сымах

Нӕ бафтыдта тасы

Адзал ӕмӕ царды ӕрӕмных…

Ӕнусты цӕринаг фыдӕлтӕ!

III

Цы зӕгъа уӕ фӕстӕ

Уӕ фӕндон,

Уӕ хъӕстӕ,

Уӕ кӕстӕр,

Уӕ тугвӕдыл фидӕнмӕ цӕуӕг поэт!

О, хай мын нӕ уыдис уӕ уындӕй:

Куы рантыстӕн дунемӕ, уӕд

Уӕ иунӕг дӕр а зӕххыл нал уыд…

Фӕлӕ –

Кӕд ратылди сау хохӕй урс дур!..

IV

– Нӕй мӕрдтимӕ дзурӕн! –

Зӕгъын мын пигмейтӕ.

– Хъӕр мӕрдтӕм дӕр хъуысы! –

Дзуапп радты мӕ бӕсты Къоста.

Уӕдӕ уӕд ныхӕй-ныхмӕ ‘рлӕууӕм,

Хӕстонтау.

Куыд зӕгъут? «Ӕхстбӕрцмӕ?»

– Нӕ, уӕ хӕстӕг н‘ амоны фадат…

Фӕлтау, цӕй, кӕрӕдзимӕ ‘рцӕуӕм…

дзырдбӕрцмӕ!

V

Фӕрсут мӕ: «Нӕ тырыса абон цы баци?»

Зӕгъын уын:

Уӕ тырыса абон ис фидар ӕрмныхты,

Сӕуӕхсидау дунейы сӕрмӕ фӕйлауы,

Ӕрвгӕрӕтты ‘нхъӕвзы

Йӕ рухс.

VI

Уӕ фарстӕн,

Уӕ сӕйрагдӕр фарстӕн

Фӕндиаг дзуапп райстат… ныр та уӕ

Ӕз афӕрсон цъустӕ –

Ныббарут цымыдис кӕстӕрӕн!

Зӕгъут-ма:

Уӕ тугӕй ӕфсӕст зӕххӕй арӕх

Цӕмӕн лӕсы алы хъылма ‘взар?

Цӕмӕн вӕййынц зыд ӕмӕ хахуыр

Ирон лӕджы худӕй уӕлдӕр?

Сымах дӕр – иу онгты ‘рхаудтат?

Зӕгъут-ма,

Цӕмӕн вӕййы афтӕ:

«Бӕрзонд идеалтыл» хъӕрахстгӕнгӕ

                                                  ф‘ аргъауы лӕг,

Йӕхиау лӕгъз дзурыныл

                                  бафтауы бирӕты ноджы…

Ӕрмӕст

Зын сахат сӕ удтӕ ӕрхӕссынц нывондӕн

Фыдыбӕстӕн йе ‘цӕг хъӕбултӕ.

Стӕй ноджы –

Куыдмадзурадӕрӕй…

Цӕмӕн вӕййы арӕх мӕнг ныхас

Хъуыддагхуыз агъуды бӕстон тыхт?

Зӕгъут-ма:

Ау, хӕсты быдыры

Фыдгулы нӕмгуыты бын чи

              уыд хӕдамад гӕнахау,

 Кӕй не ‘фтыдта тасы

Адзал ӕмӕ царды ӕрӕмных,

Уый абон куыннӕ у

Уӕд та ма хӕрз чысыл рӕстдзинад зӕгъынхъом?

Куыд лӕууы цагъарау сӕркъулӕй

Хъуымыздзых чиновничы уаты?

Цӕмӕн ныууӕй кӕны йӕ намыс

Карьерӕйы иунӕг уылынгыл!

Сымах дӕр-иу уый онгты ‘рхаудтат?

… Ӕныгусӕй бадут.

Нӕ дзурут…

Фӕлӕ уый нӕу разыйы дзуаппы нысан…

КАР

Сырхзынг нӕмгуытау, Ивгъуыды фӕныкыл

Мӕ царды бонтӕ уарӕгау кӕнынц.

Чысыл ӕртытау, дарынц уым бӕрджытӕ

Ӕмӕ сӕм тавын Абонӕй мӕхи.

Цӕуын мӕ кары.

Зноны лӕппу нал дӕн.

Мӕхицӕн мын ныр кӕстӕртӕ ӕгъдау

Кӕнынц: куы мын мӕ уӕлдай нуазӕн айсынц,

Куы та мын раттынц Ныхасы бынат.

Ӕхсызгон мын куыннӕ вӕййы, уӕвгӕ та!

Фээлӕ фесхойы зӕрдӕсӕр цыдӕр:

Кӕд фаг лӕггад нӕ бафтыди мӕ къухты

Мӕ хистӕртӕн… Уӕд къахырбыл – мӕ цард…

Ӕмӕ кӕд нал и рагбонтӕм ыздӕхӕн,

Нӕ баззайдзӕни хӕс уӕддӕр мӕныл:

Мӕ кӕстӕртӕн уыдзӕни Абон Ивгъуыд,

Ӕмӕ сын уадзын Абоны мӕ уд,

Мӕ рӕнхъытӕ – мӕ уды урс цӕхӕртӕ.