Цудайдæ мæбæл авд анзи. Колхози хутæ  хезунмæ раскъардтон, гъæуи фарсмæ ци къотæргин тъæпæн адтæй, уордæмæ. Кæронæй еу бæласи бундзæфхадбæл исбадтæн. Мæ хурдзинæй исистон киунугæ æма еу цæстæ киунугæмæ исаразун, иннемæй ба хутæмæ бакæсун. Уартæ зундгин Каля дæр æ фараст хъибилей хæццæ хезуй. Аци дзæргъи æз гъолон уарзт кæнун, кæд мин хаттæй-хатт  сæринез исуй – хезнæй фескъæруй æма исмедæг уй гъæуккæгтæй еске дзæхæрадони.

Уæд дин еу бон дæр бабæй Каляйæн æ кой дæр нæбал. Æ хъибилтæ дæр – нæййес. Æз берæ фæгъгъуди кодтон æма æргъуди кодтон, цæй, æма, зæгъун, мæ рæфтади хаййæн е ’рдæг дæттон Каляйæн.

Еци бонæй фæстæмæ Каля некæдбал рацудæй хезнæй нартихуари хумтæмæ. Рæфтад афони мæмæ æхе æрбайста, æма ин æз рæфтади æмбес равардтон.

Еци бон дæр къотæрти буни бадтæн. Æнгъæлмæ кæсун, мæ мадæ мин рæфтад кæд æрбахæсдзæнæй, уомæ. Фал мадæ нæ зиндтæй. Мадæ нæ зиндтæй, фал мæмæ Каля æхе æрбайста, фæрсæгау мæмæ ’рбакастæй, бахъур-хъур кæнуй æма бабæй хезун райдайуй.

Æз мæхе кæрдæгбæл куд рауагътон æма куд рафунæй дæн, уой не ’ргъуди кодтон.

Фуни мæ гъостæбæл рауадæй мади тарст гъæлæс:

– Иртаг! Хелагæ, хелагæ!

Æз фегъал дæн. Еу-дууæ къахдзæфи уоддæр мæмæ хелагæ æ сæр исхъел кодта, е ’взæгтæ раласта æма æ суф-суф цæуй.

Æз мæ фуртæссæй бандзуг дæн, мæ бунати байзадтæн уæлгоммæ хусгæй. Каля æ уæлгъос февзурдæй, æ дæндæгутæй хелагæн æ хъур райахæста æма ’й хæр-хæргæнгæ еуварсмæ раскъафта. Мадæ мæ уæлгъос лæууй, уой дæр æрæгиау æрæстæфтæн. Мадæ мæбæл исхуæстæй, исистун мæ кодта, уазал донæй мин мæ цæсгон æрæхснадта, æма мæхемæ ку ’рцудтæн, уæд загъта:

– Айæ, адтæй, айæ, аци хелагæ, еу хатт фæрæтæй æ къæдзелæ кæмæн рахаун кодта, е æй. Хелаги цийфæнди лухтæ ку никкæнай, уæддæр ин æ сæр ку нæ ниллихъæ кæнай, уæд нæ мæлуй: цидæр хуасгæнæн кæрдæгутæй æ лух фегъæстæ кæнуй æма бадзæбæх унцæ. Уой фæсте цæйбæрцæдæр рæстæг ку рацæуа, уæддæр æ маст нæ уадзуй. Иссеруй, ка ’й багъигæдардта, уой. Гъенур кæсис!

Каляйæн уæдæй фæстæмæ мæ рæфтади фулдæр хай дæттун райдæдтон.

ТЕХТИ Валентин