06 июля 2022

ХУÆЗДÆР АХУРГÆНГУТÆН – ПРЕЗИДЕНТОН ПРЕМИТÆ

10.06.2022 | 16:10

Цæгат Иристони ахурадæ æма науки Министради пресс-службæ куд фегъосун кодта, уотемæй аци бæнтти райдæдта педагогон архайди æнтæстдзийнæдти туххæй президентон премитæ райсуни фæдбæл конкурси регионалон къæпхæн. Уæхæн конкурс Уæрæсей еугур регионти дæр арæзт цæуй Президент Владимир Путини «Педагогон архайди зингæ æнтæстдзийнæдти туххæй хуæздæр ахургæнгутæн премитæ дæттуни туххæй» Укази бундорбæл. Конкурси туххæй, уагæвæрди куд загъд ес, уотемæй ериси ахургæнгутæн исаккаг кæндзæнæнцæ регионалон премитæ, конкурси уæлахездзаутæн ба ратдзæнæнцæ президентон премитæ фæйнæ 200 мин сомей бæрцæ.

Профессионалон дæснидзийнади конкурси архайуни фадуат ес, педагогон куст тæккæ минкъийдæр æртæ анзи ка кæнуй, алли къуæре дæр тæккæ минкъийдæр 18 уроки ка дæттуй, уæдта, æ кусти сæйраг бунат ахурадон организаций кæмæн æй, еци специалисттæн.

Ериси кæронбæттæни архайгутæ æма уæлахездзаути исбæрæг кæндзæнæй сæрмагонд конкурсон къамис (е ‘уæнгтæ уодзæнæнцæ ахурадон организацити разамонгутæ, профцæдести, ахургæнгути ассоциацитæ æма ниййергути советти минæвæрттæ). Кæронбæттæни архайгутæ æма уæлахездзаутæ циуавæр бæрæггæнæнтæмæ гæсгæ æвзурст гъæуама æрцæуонцæ, уони номхигъд исфедар кодта Уæрæсей Федераций Рохсади министрадæ.

Конкурси архайунвæндæ ка искæна, еци специалистти регистраци кæндзæнæнцæ 2022 анзи 10 июни уæнгæ, кæронбæттæни архайгути ба къамис равзардзæнæй 11 июнæй 17 июни уæнгæ.

Президентон пермитæ райсуни фæдбæл конкурси архайуни туххæй документтæ бадæттæн ес нæ республики ахурадæ æма науки Министрадæмæ (Дзæуæгигъæу, Бутырини гъæунгæ, 7, 30-аг уат). Еугур фарстатæ дæр исбæлвурдгæнæн ес уæхæн телефонæй: (8672) 29-15-15, уæлæнхасæн номер – 305.

Зæгъун гъæуй, 2021 анзи уæхæн конкурси уæлахездзаутæ иссæнцæ республики ахурадон косæндæнтти 6 специалистти.

ÆРИГОН АХУРГÆНГУТИ ФОРУМ

Цæгат Иристони фиццаг хатт уодзæнæй Æригон ахургæнгути форум «Школа молодого педагога: вектор PROдвижения». Республики еугур районтæй 50 ахургæнæгемæй фулдæр уæгъдебарæ уагæй æрдзубанди кæндзæнæнцæ нуриккон ахуради ахсгиаг лухкæнуйнаг фарстатæбæл.

– Аци æмбурд æригон педагогон профессионалон ирæзтæн, æнæмæнгæ, фæййагъаз уодзæнæй, – загъта министр. Форуми программæбæл бакустонцæ региони ассоциаци «Анзи ахургæнæги» агъазæй.

Ассоциаций иуонгтæ æмбурди архайгутæн радзордзæнæнцæ нимæдзон технологитæй пайда кæнуни æма ахуради хæццæ баст æндæр гъуддæгути туххæй. Ленингради облæсти профессион конкурсти уæлахездзаутæ æма лауреаттæ идæрддзæфмæ уагæй форуми архайдзæнæнцæ.

Цæгат Иристони паддзахадон педагогон институти агъазæй нæ республикæй ахурадæ æма науки Министрадæ æригон ахургæнгути форум «Школа молодого педагога: вектор PROдвижения»-йæн фадуæттæ исаразта.

ГАЗЕТ «ДИГОРÆ» – АЛЛИ БИЙНОНТÆН!

2022 АНЗИ ÆМБЕСÆН.
Æ РАФИНСУНИ АРГЪ АНЗИ ÆРДÆГÆН ÆЙ 323 СОМИ ÆМА 64 КЪАПЕККИ;

УÆЛБАРТÆМÆ ГÆСГÆ БА – 288 СОМИ ÆМА 96 КЪАПЕККИ.

ГАЗЕТ «ДИГОРÆ» РАФИНСУН ÆНГЪЕЗУЙ «УÆРÆСЕЙ ПОЧТИ» ЕУГУР ХАЙÆДТИ ДÆР, УÆДТА МУХУР УÆЙÆГÆНÆН КИОСКТИ ДÆР.