***

Еумæйагахурадон скъолати кълæсти разамонгутæн аллимæйон феддонтæн аци анз федералон бюджетæй дехгонд æрцæудзæнæй 74,9 миллиард соми. Уонæй Цæгат Иристон райсдзæнæй 955 миллион соми. Уонæй аци анз – 317 мин соми, иннæ хай ба – иннæ анзи. Зæгъун гъæуй уой дæр, æма кълæсти разамонгутæн алли мæйæ дæр уæлæнхасæн феддон уодзæнæй 5 мин соми.

***

Цæгат Иристони идарддæр цæуй астæуккаг профессионалон ахуради косæндæнттæмæ фæлварæнтæ дæттуни архайд. Уонæми аци анз бюджетон бунæтти бæрцæ уодзæнæй æртæ минемæй фулдæр – раздæри æнзти хæццæ рабаргæй, дууинсæй проценти фулдæр.

***

Дзæуæгигъæуи 18 июлæй фæстæмæ дæттун байдæдтонцæ сувæллæнттæ муниципалон рæвдауæндæнттæмæ барветуни туххæй æвдесæндартæ. Райсæн сæ ес Леонови гъæунги 4-аг бæстихаййи. Адæм кезуй берæ рæстæг цæмæй ма лæууонцæ, уой туххæй алли рæвдауæндонæн дæр æвдесæндартæ есунæн ес бæлвурд бонтæ æма афонæ. Аци анз Дзæуæгигъæуи æдеугурæй лæвæрд æрцæудзæнæй цуппар мин æвдесæндари.

***

Проект «Хонсайраг равналæн»-и фæткæмæ гæсгæ Чиколай Уæлахези парки нæ республики фиццаг хатт адтæнцæ æфсæддон патриотон гъæзтитæ. Райони гъæути скъолати минæвæрттæ ерис кодтонцæ Уæрæсей истори зонунæй, догъи ледзунæй, гæрæнти сæрти гæпп кæнун æма æндæр дисциплинитæй. Фæууæлахез æй Чиколай 3-аг скъолай командæ, лескейнаг æма хæзнидойнаг фæсевæд ба байахæстонцæ дуккаг æма æртиккаг бунæттæ.

***

Цæгат Иристони Тæбæхсаути Балой номбæл паддзахадон академион театри бундорбæл байгон уодзæнæй сувæллæнтти скъола-студи. Уордæмæ есдзæнæнцæ 10 сентябри уæнгæ. Ахуртæ ба си райдайдзæнæнцæ 1 октябри æма цæудзæнæнцæ къуæре æртæ хатти.

***

Цæгат Иристони фиццаг хатт байгон æй Еугуруæрæсеуон сæрдигон скъола «Анзи ахургæнæг». Аци мадзал арæзт цæуй инсæйæймаг хатт. Ка си фæййархайуй, уонæн е æй дессаги равгæ цæмæдесаг адæймæгути æма уони гъæздуг фæлтæрддзийнади хæццæ базонгæ унæн.

***

Дууадæс æма инсæй анзей размæ Цæгат Иристони АССР-и Сæйраг Совет сахар Орджоникидзейæн раздахта æ раздæри ном – Владикавказ. Уой хæццæ ба ма ин иснæуæг кодта æ историон ном дæр – Дзæуæгигъæу. Еци хъæппæрести хæццæ исарази æй УСФСР-и Сæйраг Совет дæр.