Цæгат Иристони æрдзон равналæнтæ æма экологий министради игъосункæнуйнагмæ гæсгæ, 2018 анзи завод «Электроцинк» ку исæхгæдтонцæ, уæдæй Дзæуæгигъæуи экологий уавæр бæлвурд фæххуæздæр æй. Уомæн æвдесæн – фæстаг цалдæр анзей дæргъи ами фæууинæн ке нæ адтæй, еци зæрбатгутæ, сирдтон цъеутæ æма дидинбиндзитæ заводи исæхгæди фæсте ардæмæ æрбаздахтæнцæ. Кокай-фурт куд зæгъта, уотемæй сæдæ анземæй фулдæрей дæргъи косгæй, завод куйгæлдзæн æрхи цæугæдонмæ ке калдта, еци уæззау згъæртæ нур дæр аци цæугæдони иссерæн ес.

***

Бурони фельдшерон-акушерон косæндони раздæри бæстихаййи раздæр афтек дæр бæргæ адтæй, фал æй фарæ цæмæдæр гæсгæ исæхгæдтонцæ. Аци медицинон косæндони нæуæг азгъунсти дæр афтекæн бунат бæргæ радех кодтонцæ, фал æй игон ба нæ бакодтонцæ: хуастæ имæ ласт нæ цудæй. Нур афтек рæхги байгон уодзæнæй, уой туххæй бал нерæнгæ лæвæрд æрцудæй сæрмагонд сертификат.

***

Мæцути ба æрæги байгон æй фельдшерон-акушерон пункт. Уой фæрци Дигоргоми гъæути цæргутæн фæззиндтæй дæсни медицинон агъаздзийнадæй пайда кæнуни фадуат. Аци медицинон косæндони косдзæнæнцæ терапевт, фельдшер, медицинон хуæрæ, санитаркæ, уой хæццæ ба ма син байгон кæндзæнæнцæ афтек дæр.

***

Уæрæсей планетарити Ассоциацимæ хаст æрцудæй Дзæуæгигъæуи планетарий дæр – е æй Цæгат Кавкази еунæг уæхæн наукон-рохсадон косæндонæ, кæци бацудæй еугуруæрæсеуон æмæхсæнадæмæ. Тагъд рæстæги ба ассоциаций иуонгтæ, сæ хæццæ Цæгат Иристони минæвæрттæ дæр, уотемæй æрæмбурд уодзæнæнцæ сахар Армавири – уоми 12 августи арæзт æрцæудзæнæй сæрмагонд фестиваль.

***

Бæрзондхуæнхон альпинистон центр «Коми-Арт»-и æрæги сæрмагондæй кизгуттæн арæзт æрцудæй спортивон лагерь. Æ нисанеуæг – фæййагъаз кæнун алли кизгæн æхецæн спорти зæрдæмæдзæугæдæр хузæ равзарун. Мадзали архайдтонцæ Уæрæсей алли рауæнтæй æрбацæуæг 75 кизги.

***

Зундгонд ахургонд Чибирти Людвиги монографи «Осетинская нартиада» англисаг æвзагмæ ратæлмац кодта Цæгат Иристони паддзахадон университети фæсарæйнаг æвзæгти кафедри доцент Карсанти Еленæ. Киунугæн бал мухургонд æрцудæй æ фиццаг тираж – 500 экземпляри.