21 майя 2024

ХУАРЗ ХАБАР – НИФСДÆТТÆГ!..

14.09.2022 | 14:37

Уæрæсей Хецауадæ Цæгат Иристонæн федералон бюджетæй уæлæнхасæн радех кодта 48 миллиони æма 803 мин соми республики социалон-экономикон райрæзти мадзæлттæ æнхæст кæнунæн. Уонæй 13 миллиони æма 950 мин соми харзгонд æрцæудзæнæнцæ цæрæнуатон-коммуналон хæдзаради проектти-хæрзти гæгъæдитæ искæнунæн, уомæй уæлдай – Мæздæги æма Горæтгæрон районти нæуæг объектти проектти-хæрзти гæгъæдитæ исцæттæ кæнунæн ба – 34 миллион æма 850 мин соми.

* * *

Туристон-рекреацион комплекс «Мамисон»-и арæзтади нуртæккæ сæйрагдæр æргом æздæхт цæуй ами транспортон æма инженерон инфраструктури фарстатæ æнхæст кæнунмæ. Куд нисангонд æй, уотемæй 2023-2024 æнзти гъæуама исаразонцæ нæдти æртæ объекти. Уой туххæй Уæрæсей Хецауади фæстауæрцон фондæй аци анзæн радех кодтонцæ 865 миллион соми. Æвæрд цæуй фарста, цæмæй 2023 анзи æнхæсткæнуйнаг куститæн федералон бюджетæй радех кæнонцæ 721 миллион соми.

* * *

Æрæги Хумæллæги байгон æй нæуæг амбулатори. Косдзæнæнцæ си терапевт, педиатр, акушеркæ, æртæ медицинон хуæри. Сæ косæнуæттæ ефтонггонд æнцæ гъæугæ медицинон косæнгæрзтæй.

Куд нисангонд цæуй, уотемæй аци анзи кæронмæ ма Бехъани гъæуи байгон уодзæнæй фельдшерон-акушерон пункт.

* * *

Нæ республики цæргутæй нуртæккæ æгуст ка ‘й, уонæй анзи райдайæнæй 300 адæймаги рарвистонцæ, уой фæсте син куст кæбæл уодзæнæй, уæхæн дæсниæдтæбæл исахур кæнунмæ. Зæгъæн, национ проект «Демографи»-й фæрци 153 адæймаги исахур кодтонцæ хуæруйнаггæнæгбæл, экскаватори машинистбæл, бухгалтербæл. Паддзахадон программæ «Кустефтонгдзийнадæн агъаз  кæнун»-и фæрци ба ма 135 æгуст адæймаги исахур кодтонцæ ауæхæн дæсниæдтæбæл: гид-экскурсовод, конструктор-технолог, гъомбæлгæнæг…

* * *

Кустефтонгдзийнади служби фæрци аци анз Цæгат Иристони куст лæвæрд æрцудæй 942 æнагъонемæн. Æригæнттæй кусти ниллæуун ке фæндуй, уони бæрцæ анзæй-анзмæ фулдæр кæнуй. Е уой бæрæггæнæн æй, æма ирæзгæ фæлтæри уодиконди федардæр кæнуй раст зундирахаст, хе хъаурæй карнæ аразунмæ тулавастдзийнадæ. Цуппæрдæс-æстдæс анзи кæбæл цæуй, еци æнагъонтæй беретæ зæрдиагæй архайунцæ мемориалти, æнсувæрон циртити алфамбулай фæзуæттæ æфснайæн кустити. Æригæнттæн кустбæл фæххуæст уни гъуддаги уæлдай лæмбунæг цæстдард цæуй, царди зин уавæрти ка бахауй, уонæмæ, куст син лæвæрд цæуй еугурей разæй.