Александр Пушкини номбæл аййевæдти Паддзахадон музейи цæгаткавказаг филиали адтæй нуриккон аййевади аллианзон фестиваль «Аланикæ» байгон кæнуни фæдбæл æмбурд. Аци проект иссæй аййевадон хъæппæреси Президенти фонди грантон ериси уæлахездзау.

Куд зонæн, уотемæй нуриккон аййевади фестиваль «Аланикæ» æй Цæгат Кавкази цæстуингæ аййевади ахсгиагдæр проект. 2023 анзи байгон уодзæнæй æхсæрдæсæймаг хатт. Мадзали сæйрагдæр ихæс – нуриккон аййевади фæрци равдесун Цæгат Кавкази культурон бундори бунат Уæрæсей культурон царди. Проекти архайгутæ ‘нцæ, фиццагидæр, хуæнхон æма хуæнхрæбунти минкъий музейтæ Иристон, Дагестан, Цæцæн æма Хъæрæсе-Черкесси арæнти, дуккаги ба – нуриккон аййевади косæг хузæгæнгутæ.

***

Æрæги Сочий арæзт бæгæний равдистити рæстæг, бæгæнифицæн завод «Бавари»-йи разамунди хæццæ еумæ рахастан аци анзи сентябри кæрони радон «Бæгæнифицгути хонсайраг форум» Дзæуæгигъæуи исаразуни туххæй унаффæ. Аци  хабар бæгæнифицгутæн æхцæуæнæй игъосун кæнун, – загъта журнал «Индустрия напитков»-и сæйраг редактор, «Бæгæнифицгути хонсайраг форум»-æн фадуæттæ исаразæг Михаил Сгибнев.

Айдагъ уæрæсейаг бæгæнифицгутæ нæ, фал Германийæй, Чехи, Венгри, Итали, Австри, Франци æма Америки Еугонд Штаттæй дæр минæвæрттæ кумæ ‘рбацæунцæ, уæхæн дуйнеуон форум «Пиво. Сочи»-й «Бавари» рагæй архайуй.

***

Компани «Газпром газдехгæнæн Дзæуæгигъæу» Алагири райони гъæутæмæ газ уадзуни куст идарддæр æнхæст кæнуй.

Нуриуæнгæ гъæути 51 хæдзареми газ бауагътонцæ, никкидæр ма 48 хæдзарей уæнгæ ба бахъæрттæнцæ газуадзæн хæтæлтæ. Аци анз никкидæр ма 105 курдиади кæронмæ банхæст кæнунмæ гъавунцæ.

***

Нæ республики æнæнездзийнадæ гъæуайкæнуйнади министр Тебиати Сослан куд фегъосун кодта, уотемæй онкологон незтæй сæйгæ адæми гъæугæ хуастæй льготон æгъдауæй исефтонг кæнуни туххæй региони бюджетæй радех кодтонцæ 150 миллион сомей бæрцæ фæрæзнитæ.

Æдеугурæй æнæнездзийнадæ гъæуайкæнуйнади паддзахадон бюджетон косæндонæ «Республики онкологон диспансер» диспансерон уагæй цæстæ даруй 16 мин сæйгемæ. Аци сæйгитæй 1300 адæймаги æнцæ льготон хуастæй ефтонг кæнун гъæуагæ. Льготон хуастæй сæйгити исефтонг кæнунæн ба радех кодтонцæ 692 миллион соми, льготникти еумæйаг нимæдзæ ‘й 64593 адæймаги. Анзи райдайæнæй нурмæ сæйгитæн равардтонцæ 371 миллион сомей аргъ 72 мин рецепти.