06 июля 2022

ХУАРЗ ХАБАР – НИФСДÆТТÆГ!..

17.06.2022 | 15:48

Аци анз Дзæуæгигъæуи электроники колледжи байгон уодзæнæнцæ, тæккæ нуриккондæр домæнтæмæ гæсгæ равгитæй æнхæст ка уодзæнæй, уæхæн æрмадзтæ. Нерæнгæ бал син исамал кодтонцæ ахурадон-кустадон æма ахурадон-лабораторон ефтонггæрзтæ.

***

Цæгат Иристони амалгъонтæн ес равгæ, «Энергия идей», зæгъгæ, бизнес-проектти федералон конкурси архайунæн. Мадзал арæзт æрцæудзæнæй инвестицион-промышленнон холдинг GS Group-и хъæппæресæй æма Калинингради губернатори цæстдарди фæрци. Конкурси архайуни туххæй курдиадæ бадæттун æнгъезуй аци анзи 18 августи уæнгæ.

***

Цæгат Иристонмæ хъæртун байдæдтонцæ ахурадон ефтонггæрзтæ, «Точка роста», зæгъгæ, мадзал исефтонг кæнунæн. Ахури нæуæг анзи нæ республики байгон уодзæнæнцæ 22 центри æрдзон-наукон æма технологон нисанеуæгæй: уонæй фæйнæ æрти Алагири, Ирæфи, Æрæдони æма Рахесфарси, фæйнæ дууи – Горæтгæрони æма Дигори районти, æхсæз ба – Мæздæги райони.

***

Рæхги Ставд-Дорти косун байдайдзæнæй гъæууон аптекæ. Зæгъун гъæуй уой, æма уæхæн аптекитæ ма сæрди дæргъи фæззиндзæнæнцæ нæ республики иннæ идæрддзæф гъæути дæр.

***

Цæгат Иристони идарддæр æнхæстгонд цæунцæ энергетикон комплекси дæлстанцитæ цалцæг кæнуни программæ. Агъазиаудæр объекттæмæ хаунцæ Дзæуæгигъæуи дæлстанцитæ «Дзæуæгигъæу-1», «Галеуфарсаг», «Цæгат-Нигулæйнаг», «Хонсар-Нигулæйнаг», «ЦРП-1», уæдта гъæууон районти дæлстанцитæ «Чикола», «Дигора», «Елхот», «Беслæн», «Мæздæг» æма æндæртæ.

***

Аци анз сувæллæнтти фæлладуагъдæн мадзæлттæ аразуни гъуддаги архайдзæнæнцæ Цæгат Иристони цуппæрдæс æма фондзинсæй ахургæнæндони. Сæ фæллад исуадздзæнæнцæ дууадæс мин скъоладзауи.

***

Сахар Туапсей æрæги рацудæнцæ дуйнеуон турнир «Уорс бæлæгъ»-и цуппæрæймаг этапи еристæ шахмæттæй скъоладзаути командити ‘хсæн.

***

Цæгат Иристони номæй си архайдта Дзæуæгигъæуи скъола-лицейи командæ, æ сæргъи тренер Игорь Хрипков, уотемæй. Турнири Цæгат-Кавказаг федералон зилдæй ци аст команди архайдта, уонæй хуæздæр рауадæй иристойнæгти архайд. Фал турнири еугур архайæг 83 командей æхсæн ба махонтæ байахæстонцæ 24-аг бунат. Уой дæр æнтæстдзийнадæбæл банимайун æнгъезуй, уомæн æма уæхæн бæрæггæнæн бавдесун æригон шахматисттæн бантæстæй фиццаг хатт.

ГАЗЕТ «ДИГОРÆ» – АЛЛИ БИЙНОНТÆН!

2022 АНЗИ ÆМБЕСÆН.
Æ РАФИНСУНИ АРГЪ АНЗИ ÆРДÆГÆН ÆЙ 323 СОМИ ÆМА 64 КЪАПЕККИ;

УÆЛБАРТÆМÆ ГÆСГÆ БА – 288 СОМИ ÆМА 96 КЪАПЕККИ.

ГАЗЕТ «ДИГОРÆ» РАФИНСУН ÆНГЪЕЗУЙ «УÆРÆСЕЙ ПОЧТИ» ЕУГУР ХАЙÆДТИ ДÆР, УÆДТА МУХУР УÆЙÆГÆНÆН КИОСКТИ ДÆР.