07 августа 2022

ХУАРЗ ХАБАР – НИФСДÆТТÆГ!..

30.06.2022 | 17:52

Нæ тæккæ сагъæссагдæр фарстатæй еу – республики нæдтæбæл цæуни æдасдзийнади уавæр статистикон бæрæггæнæнтæ куд æвдесунцæ, уотемæй аци анзи фондз мæйемæ амунд адæймæгутæ кæми архайдтонцæ, Цæгат Иристони рауайæг 23 уæхæн фæндаггон-транспортон бæлахи бахауæг 27 адæймагемæй 4 фæммард æнцæ. Бæлæхтæ ахиддæр æрцæунцæ, хуæдтолгæскъæргутæ нæдтæбæл цæуни фæткитæ ке не ’нхæст кæнунцæ, уой фудæй.

***

Уæрæсей æма фæсарæйнаг бæститæй нæ республикæмæ æрбацæуæг бæлццæнтти цæстиварди фулдæр æнцæ экологон æма культурон-рохсадон туризми программитæ. Нуртæккæ нæмæ цæттæгонд æнцæ 23 туристон-экскурсион маршрути, косуй нæмæ 8 туристон компаний.

***

Цæрунæн аккаг ка нæбал æй, уæхæн цæрæн хæдзæрттæй адæми аккаг рауæнтæмæ раййевунæн Цæгат Иристони 2022-2023 æнзти радех кæндзæнæнцæ 542 миллион соми. Сæ цæрæн рауæнтæ фæххузæнон кæнунмæ æнгъæлмæ кæсунцæ 241 бийнонти (682 адæймаги). Куд нисангонд цæуй, уотемæй нæуæг цæрæнтæ райсдзæнæнцæ: Мæздæги – 102, Дзæуæгигъæуи – 8, Рахесфарси райони – 27 бийнонти.

***

Нæ республики адæми кустефтонгдзийнади фæдбæл Комитет æма силгоймæгти Цæдес æрæги ци сæрмагонд æмбурд исаразтонцæ, уоми дзубанди цудæй кустагорæг силгоймæгтæн аккаг куст мадзал кæнуни равгитæ æма гæнæнти фæдбæл.

***

Национ театри фестиваль «Хъиримаг фæззæг» аци анз рацæудзæнæй Дзæуæгигъæуи 5-11 сентябри. Аци мадзалбæл цæуй цуппар анзи, дууæ хатти си архайдта нæ республики Е. Вахтангови номбæл Академион театр. Нури фестивалæн дæр кæронбæттæн искæндзæнæй аци исфæлдистадон коллектив спектакль «Сотворившая чудо»-йæй.

***

Уæрæсей фæсевæди Бони кадæн æрæги Горæтгæрон райони арæзт æрцудæй аллибони республикон фестиваль «Нæртон гъæзтитæ». Æ нисанеуæг æй нæ адæми æгъдæуттæ æма фæткитæ, нæ национ культури фарнæ багъæуай кæнун æма сæ ирæзгæ фæлтæртæн сæ уодварнон ахедундзийнадæй бафæдзæхсун…

***

Зундгонд куд æй, уотемæй сæрмагонд федералон программи фæлгæти Цæгат Иристони бундорон æгъдауæй исцалцæг кæндзæнæнцæ 63 еумæйагахурадон скъолай. Фал нур куд исбæрæг æй, уотемæй Уæрæсей рохсади министрадæ ци унаффæ исфедар кодта, уомæ гæсгæ, еци цалцæги программæмæ бахæсдзæнæнцæ никкидæр ма æртæ цæгатиристойнаг астæуккаг ахургæнæндони: Алагири скъола-интернат, Мæхческ æма Хæзнидони скъолатæ.