Цæгат Иристони æма Хъæрæсе-Черкесий разамонгутæ Сергей Меняйло æма Рашид Темрезов æрдзубанди кодтонцæ дууæ цæгаткавказаг республикей ’хсæн æмгустадæ рапарахат кæнуни æма социалон-экономикон къабæзти фæлтæрддзийнадæй кæрæдземæн агъаз кæнуни фарстатæбæл.

* * *

«Æфсади кадæнгитæ», зæгъгæ, федералон телеканал «Æстъалу»-йи сæрмагонд программи кезуй рауагъд нивондгонд уодзæнæй номдзуд тæхæг, Советон Цæдеси Бæгъатæр, инæлар Дзусати Ибрагимæн. Æвдист ба райдайдзæнæй 23 октябри 12 сахатти æма 15 минуттебæл.

* * *

Цæгат-Кавказаг Суворовон æфсæддон училищей адтæй æхсардзийнади урок. Суворовонти хæццæ фембæлдмæ æрбацудæнцæ сæрмагонд æфсæддон операций архайгутæ.

Дæлболкъон Сафар Гусейнов æма хестæр лейтенант Кирилл Юхлов æвзонг фæсевæди хæццæ дзубанди кодтонцæ æхсардзийнадæ, ихæс æма еузæрдиуондзийнадæбæл. Дзурдтонцæ син, кæддæр сæхуæдтæ дæр æфсæддон дæсниадæ куд æвзурстонцæ, æфсæддон исунмæ, службæ кæнунмæ айдагъ хъæбæр хуарз физикон цæттæдзийнадæ ке нæ гъæуй, фал ма гъæддух психологон уавæр дæр, еци менеугутæбæл.

* * *

Национ проект «Æнæнездзийнадæ гъæуайкæнуйнадæ»-йи онкологон незти нихмæ тохи фæдбæл сæрмагонд программæмæ гæсгæ нæ республикон онкологон диспансерæн æлхæд æрцудæй 74 миллион сомей аргъ ефтонггæрзтæ. Еуетæ си нерæнгæ æвæрд æрцудæнцæ, иннетæ ба гъæуама исхъæртонцæ аци анзи кæронмæ.

* * *

Цалдæр социалон хемæрайст ихæси æнæгъæнæй дæр исæнхæст кæнунæн федералон бюджетæй нæ республикæ ци æхцай фæрæзнитæ райста, уонæй 336 миллион соми уæлæнхасæн дехгонд æнцæ, 3 анземæй 7 анзи кæбæл цæуй, еци сувæллæнттæн феддонтæн, 85,7 миллион соми ба æртиккаг æма фулдæр сувæллæнтти райгурди фæдбæл аллимæйон феддонтæн. Уомæй уæлдай уæлæнхасæн ма дехгонд æрцудæй 67,5 миллион соми кæлæдздзаг хæдзæртти цæргути уордигæй аккаг цæрæн рауæнтæмæ раййевунæн паддзахадон программæ æнхæст кæнуни туххæй.

* * *

Ногири культури Хæдзари ансамбль «Цæхæртæ», æ сæргъи Шевердова Гаэнэ, уотемæй æнтæстгинæй архайдта «Хæрдæлвæст æстъалу», зæгъгæ, сценикон аййевади Æхсæндуйнеуон фестиваль-конкурси. Æма се ’мгæрон æрлæууæг си нæ разиндтæй – «Адæмон кафт», зæгъгæ, ериси авд аййевадон хуземæй еугуреми дæр иссæнцæ уæлахезон, лæвæрд син æрцудæй фиццаг къæпхæни лауреатти хуæрзеугутæ.

* * *

Нæ республики туризми фæдбæл Комитет есуй курдиæдтæ аци къабази архайдæн грантти хузи субсидитæ райсуни туххæй. Курдиæдтæ ист цæудзæнæнцæ комкоммæ Комитети 28 октябри уæнгæ 9 сахаттемæй ба 18 сахаттемæ.