24 апреля 2024

ХУАРЗ КУСТÆН АККАГ АРГЪГОНД РАЗÆНГАРД КÆНУЙ…

30.03.2024 | 21:20

Федералон паддзахадон компани «Регионти ирæзти фонд» фегъосун кодта, цæрæнуатон-коммуналон хæдзаради кусти къулумпитæ райеуварс кæнуни ахедгæдæр архайд кæми кæнунцæ, еци уæрæсейаг регионти номхигъд. Хуæздæр регионти ’хсæн – Цæгат Иристон дæр.

Уой туххæй фегъосун кодта федералон косæндони пресс-службæ.

Зундгонд куд æй, уотемæй «Регионти ирæзти фонд» арæзт æрцудæй Президент Владимир Путини Указæй. Компаний архайди сæйрагдæр нисантæ ’нцæ бæсти регионти идарддæри райрæзти фарстатæ, комкоммæ ба – цæрæнуатон-коммуналон хæдзарадæ æма æндæр цардиуагон лæггæдти нивæбæлдзийнади проекттæ.

Федералон фонди специалисттæ еудадзугдæр сæ цæстæ дарунцæ, регионти æмвæзадæбæл цæрæнуатон-коммуналон хæдзаради комплекси кусти къулумпитæ куд еуварсгонд цæунцæ, уомæ дæр. Еци кусти, ке зæгъун æй гъæуй, фæлхасгæнгутæн ахсгиагдæр æй, цæмæй аллихузон коммуналон къулумпитæ цубурдæр рæстæгмæ еуварсгонд цæуонцæ. Æма еци кусти дæр компани исбæрæг кæнуй раззагдæр æма фæстезад регионтæ.

Аци бæнтти ба фонди минвæрттæ исаразтонцæ радон уæхæн рейтинг. Уотемæй хуæздæрти номхигъдмæ хаст æрцудæй Цæгат Иристон дæр. Уотæ, Цæгат Иристони аллихузон коммуналон къулумпитæ райеуварс кæнунбæл рæстæмбес нимадæй харзгонд æрцæуй 2,6 сахаттей бæрцæ.

Косæндони специалисттæ, уæхæн рейтингтæ аразгæй, аргъ искæнунцæ цæрæнуатон-коммуналон хæдзаради еугур  хайæдти (гъардæттæн, электрон тухдæттæн, газ æма донуадзæн хæтæлтæ æма уотæ идарддæр) архайдæн дæр.

– Фæстаг æнзти бæрæггæнæнтæ куд æвдесунцæ, уотемæй цæрæнуатон-коммуналон къулумпитæ райеуварс кæнунæн ци рæстæг багъæуй, е минкъийдæргæнгæ цæуй. Зæгъæн, 2021 анзи уæхæн къулумпитæ райеуварс кæнунæн рæстæмбес нимадæй гъудæй 9 сахаттей бæрцæ, 2023 анзи ба – 7,7 сахаттей бæрцæ. Аци анзи райдайæнæй нуриуæнгæ нимæдзæ фæмминкъийдæр æй 6,9 сахаттемæ. Уой хæццæ, регионти размæ æвæрд цæуй нисан, цæмæй уæхæн коммуналон къулумпитæ райеварс кæнуни рæстæг никкидæр фæмминкъийдæр уа, – радзурдта «Регионти ирæзти фонд»-и генералон директор Ильшат Шагиахметов.