19 майя 2022

ИГЪУСТГОНД ФОНДИ ХАЙАДӔ – ДЗӔУӔГИГЪӔУИ

21.08.2021 | 16:34

Аци анз июни игъустгонд фонд «Сколково»-й минӕвӕрттӕ косӕг балций адтӕнцӕ Цӕгат Иристони. Уӕд фусунтӕ ӕма иуазгутӕ бадзубанди кодтонцӕ фонд ӕма нӕ республики  ‘хсӕн урух ӕмгустадӕ рапарахат ӕма берӕвӕрсуг бастдзийнӕдтӕ фенгомдӕр кӕнуни нисанти фӕдбӕл.

Ӕма ци фарстатӕбӕл ӕрдзубанди кодтонцӕ, уони фӕдбӕл бӕлвурд куст райдайунӕн мадзӕлттӕ фӕббӕлвурддӕр кӕнуни зӕрдтӕй аци бӕнтти Цӕгат Иристон бабӕрӕг кодта фонди регионалон ӕма дуйнеуон ӕмархайди фарстати фӕдбӕл вице-президент Юрий Сапрыкин. Нӕ республики Сӕргълӕууӕги ихӕстӕ рӕстӕгмӕ ӕнхӕстгӕнӕг
Сергей Меняйлойи хӕццӕ фембӕлди рӕстӕг куд фегъосун кодта, уотемӕй Дзӕуӕгигъӕуи байгон уодзӕнӕй фонд «Сколково»-йи минӕвайрадӕ. Уой косгути бӕрни уодзӕнӕй еумӕйаг проекттӕ ӕнхӕст кӕнуни комкоммӕ куст. Уой хӕццӕ, куд нисангонд цӕуй, уотемӕй фонди дзӕуӕгигъӕуккаг минӕвайради архайд рахъӕртдзӕнӕй еугур Цӕгат Кавкази федералон зилдбӕл дӕр.

Сергей Меняйло хуарз аргъ искодта уӕхӕн еумӕйаг пълантӕн. Ӕ дзубандимӕ гӕсгӕ, цӕмӕдессагдӕр проекттӕн берӕвӕрсуг агъаз уодзӕнӕй республики разамунди ‘рдигӕй.