ЦÆГАТ Иристони фиццаг хатт райдæдта æригон профессионалти хумæтæг дæсниæдти еристи 10-аг национ чемпионат. Мадзал арæзт цæуй Æрæдони цæгаткавказаг аграронехнологон колледжи бундорбæл. Еристæ æнцæ: фермерон хæдзарадæ, гъæдæй пайда кæнуни, агоридорæй амайуни куст æма къеретæ кæнуни дæсниæдтæй.
Нæ республикæмæ ци æригон фæсевæд æрцудæй Уæрæсей 54 регионемæй, етæ сæ зонундзийнæдтæ уæлдæрамунд дæсниæдти æвдесдзæнæнцæ гъæугæ уавæрти.
Нæ республики Сæргълæууæг Сергей Меняйло аци мадзал бабæрæг кæнгæй, загъта:
– Национ чемпионат аразун хъæбæр ахсгиаг гъуддаг æй. Фиццагидæр æхцæуæн æй уомæй, æма фæстæмæ нæуæггонд цæунцæ, советон доги сæхе пайдахæссæгæй ка бавдиста, еци æгъдæуттæ – фæсевæди æргом хумæтæг дæсниæдтæмæ æздахун æма уой туххæй астæуккаг ахуради еугур гъæугæ равгитæ дæр аразун. Абони куд уинæн, уотемæй айдагъ нæ республики нæ, фал æнæгъæ нæ бæсти дæр нæ фагæ кæнунцæ гъæдикустгæнгутæ, æндадзгутæ, аразгутæ æма берæ æндæр дæсниæдтæ.
Советон скъолати ци профориентацион куст цудæй, уой фæстæмæ раздахун никки бæрзонддæр æмвæзадæмæ æй нæ ихæс. Алагири ци гъæди хæдзаради техникум ес, е æ рæстæги берæ дæсни специалисттæ рауагъта айдагъ нæ республикæн нæ, фал æнæгъæнæ Уæрæсейæн дæр. Гъулæггагæн, абони æ уавæртæ æма æ куст фæкъкъулумпи ‘нцæ, æма, уобæл сагъæс кæнгæй, архайдзинан фæстæмæ уæлдæр амунд хумæтæг дæсниæдтæбæл специалисттæ цæттæ кæнуни гъуддаг иснæуæг кæнунбæл.
Æригон профессионалти 10-аг национ чемпионати архайгутæ ‘нцæ, æхе региони уæлахездзау ка иссæй, етæ. Нур ба архайдзæнæнцæ Мæскуй кæронбæттæн еристи. Етæ цæудзæнæнцæ 22 апърели уæнгæ.