Цæгат Иристони Сæргълæууæг Сергей Меняйло архайдта, Цæгат Кавкази федералон зилди Уæрæсей Президенти Æнхæстбаргин минæвар Юрий Чайка ци урух видеоконференци исаразта, уоми. Дзубанди си цудæй экономикон райрæзти фарстатæн сæ ахсгиагдæрти фæдбæл, сæрмагондæй ба æрдзурдтонцæ Цæгат Кавкази федералон зилди регионти индустриалон (промышленнон) парктæ исаразуни гъуддагбæл.

Юрий Чайка æмбурди райдайæни куд фæббæрæг кодта, уотемæй уæхæн фембæлд арæзт æрцудæй федералон зилди субъектти разамонгути хъæппæресæй. Гъуддаг уой медæги ’й, æма регионти минæвæрттæ фарста исæвардтонцæ, цæмæй федералон Хецауадæ регионтæн нæуæгæй сæрмагонд субсидитæ дæттун райдайа индустриалон æма технологон парктæ аразунæн. Президенти минæвари загъдмæ гæсгæ, еци курдиади фæдбæл е сæрмагонд финстæг рарвиста Уæрæсей Федераций Хецауади Сæрдар Михаил Мишустини номбæл. Уой хæццæ, фæндон хаст цæуй, цæмæй федералон зилди уæхæн промышленнон парктæ игон кæнунæн субсидитæ лæвæрд цæуонцæ нисанмæ арæзт паддзахадон программæ «Экономикон райрæзт æма инновацион экономикæ»-йи фæлгæти.

– Нæ курдиади фæдбæл Михаил Мишустин бæлвурд амунддзийнæдтæ равардта экономикон ирæзти министради разамундæн. Æма бал хаст æрцудæй унаффæ, цæмæй федералон акционерон æхсæнадæ «Кавказ. РФ»-ий фадуæтти фæрци куст райдайа федералон зилди субъектти индустриалон парктæ аразуни куст. Хæстæгдæр рæстæг «Кавказ. РФ»-ий специалисттæ сæ хатдзæгтæ кæнун райдайдзæнæнцæ индустриалон паркти проектти фæдбæл. Уомæй уæлдай, регионалон технопарктæ аразуни гъуддагмæ се ’ргом раздахдзæнæнцæ æндæр профилон федералон ведомствитæ дæр, – бафеппайдта Юрий Чайка.

Уой фæсте æмбурди радзубанди кодтонцæ Цæгат Кавкази регионти сæргълæугутæ. Етæ лæмбунæг радзурдтонцæ, индустриалон парктæ исаразунбæл ци организацион куст цæуй, уой туххæй.

Уотæ, Сергей Меняйло куд фегъосун кодта, уотемæй нуртæккæ республикæ косуй раздæри завод «Фронтон»-и бæстихæйтти промышленнон парк исаразунбæл. Уæхæн проект æнхæст кæнуни хъæппæрес равдиста компани «Ирстоун». Уой хæццæ, республики Хецауадæ æма инвестор уæхæн технопарк исаразуни туххæй бадзурдбæл бадзубанди кодтонцæ.

– «Фронтон»-и бæстихæйтти техникон уавæр фадуат дæттуй, цæмæй уоми федæни фæззинна индустриалон парк. Уой хæццæ, нæуæг æууæлтæ хинцгæй, проекти инвестормæ фæхъхъæртун кодтан паддзахадон субсиди райсуни фæдбæл нæуæг уагæвæрди туххæй еугур информаци дæр. Нæ зæрдæ дарæн, республикон индустриалон парк исаразуни проект компани «Кавказ. РФ»-ий минæвæрттæ хуарзбæл ке банимайдзæнæнцæ, уобæл, – загъта Сергей Меняйло.

Идарддæр республики разамонæг куд радзурдта, уотемæй технопарк исаразуни проектбæл ба республикæ косуй паддзахадон корпораци «Ростех»-и хæццæ. Республикæ цæттæ кæнуй æндæр цæмæдесаг проекттæ дæр.

Æмбурди кæронбæттæни Юрий Чайка еугур регионти минæвæрттæмæ дæр бахадтæй, цæмæй урух испайда кæнонцæ, индустриалон парктæ аразунæн федералон Хецауадæ ци уæлæнхасæн фадуæттæ исаразта, уонæй.