28 майя 2022

КӔРӔДЗЕЙ ЛӔДӔРУН – СӔЙРАГДӔР

15.01.2022 | 16:32

Уӕрӕсей мухури Бон бӕрӕг кӕнгӕй, куд гъӕуама не ’сцитгин кӕнӕн, аци къабази хъазауатонти, уӕлдайдӕр ба сӕ хестӕрти!.. Уонӕй еу ӕй Къубалти Ӕнхъӕли фурт Солтан – нӕ Иристони номдзуддӕр лӕгтӕй еу, дӕсгай ӕнзти дӕргъи рӕстзӕрдӕй фӕллойнӕ кӕнуй нӕ национ журналистики сӕрбӕлтау,  разамунд лӕвардта Кирови райони газет «Размӕ»-йӕн, ӕй Цӕгат Иристони культури ӕскъуӕлхт архайӕг.

Журналист ци берӕ монон домӕнтӕй ихӕсгин ӕй, уонӕй еу ӕй – дзилли размӕ ци зӕгъуйнӕгтӕ рахӕссис федауцӕн, уонӕмӕ гӕсгӕ гъӕуама аразай дӕхе цардиуагӕ дӕр. Ӕма Къубалти Солтан, куд журналист дӕр ӕма хумӕтӕг ирон лӕг дӕр, уотӕ раст еци хузи ӕ цӕргӕ-цӕрӕнбӕнтти ӕнхӕст кӕнуй ӕ карни хабӕрттӕ. Ӕ исфӕлдистадон кустӕй уӕлдай ма разӕнгардӕй архайуй ӕхсӕнадон гъуддӕгути, ӕновудӕй хъиамӕт кӕнуй, цӕмӕй нӕ адӕми цардаразӕг ӕгъдӕуттӕ ӕма фӕткитӕ тӕккӕ хуӕздӕр хузи ӕнхӕстгонд цӕуонцӕ, агъазгӕнӕг нин уонцӕ абони дӕр ӕма исонибони дӕр. Уой фӕдбӕл мухури фӕрӕзнити ахид фӕззиннунцӕ ӕ медесгун уацтӕ дӕр. Уонӕй еу мах дӕр абони мухур кӕнӕн 3-аг фарсбӕл.