24 майя 2022

КӔРДТУ СӔРТӔГ ӔЙ…

18.11.2020 | 14:36

КОЛИТИ Виталий, Уæрæсей финсгути Цæдеси иуонг

(Боллоти Полийи номбӕл)

Мӕнӕ абони ци силгоймаги къарӕ мухур кӕнӕн, уой нури кӕстӕртӕ, ӕвӕдзи, нӕ зондзӕнӕнцӕ, фал ӕй хестӕртӕ ба уайтӕккӕ дӕр базондзӕнӕнцӕ – Боллоти Полий

Елхъани кизгӕ. Ӕ рӕстӕги ӕ фӕллойнадон ӕнтӕстдзийнӕдти аци хъазауатон колхозон силгоймаги кой ӕ райгурӕн Ӕхсӕрисӕрӕй райгъустӕй хъӕбӕр идӕрдтӕбӕл – айдагъ Иристонбӕл нӕ, фал ма нӕ устур Советон Цӕдеси берӕ рауӕнтӕбӕл дӕр. Райгурӕн бӕстӕ ин исаккаг кодта Социалистон Фӕллойни Бӕгъатӕри цитгин ном. Аци анз ӕ райгурдбӕл  исӕнхӕст ӕй дӕс ӕма фондзинсӕй анзи, ӕма уой фӕдбӕл ци ӕрмӕгутӕ мухур кӕнӕн, уонӕй дууӕ бацӕттӕ кодта ӕ хуӕрзсинхон Колити Виталийи финст номерӕн новеллӕ ӕма имисуйнӕгтӕ.

Ӕхсӕрисӕри ма цӕргӕй, рӕзӕ бӕлӕстӕ ни ке дзӕхӕрадони нӕ адтӕй, уӕхӕнттӕ ӕстӕнтӕ адтӕнцӕ. Фал нӕмӕ уӕддӕр нӕ уод, нӕ цӕстау кастӕй, биццеу уогӕй, еске дзӕхӕрадонӕмӕ балӕсун, цума уони рӕзӕ адгиндӕр уидӕ, уотӕ нӕмӕ кӕсидӕ.

Мадта уӕлдай ӕновуддӕр ба адтан Боллоти Полийи сӕрддон кӕрдтутӕ ӕма фӕткъутӕбӕл. Уогӕ, айдагъ мах нӕ, – ӕхе фурти биццеутӕ дӕр нӕ хӕццӕ ӕмдавинӕ уиуонцӕ.

Уотемӕй еу фӕсарӕфти, бӕласи сӕрбӕл куд адтан, уотемӕй Полий нӕ цори ӕрбалӕудтӕй. Иннетӕ бӕргӕ ӕртӕррӕститӕ кодтонцӕ, мӕнӕн ба мӕ къах къалеуи сагели рахастӕй ӕма бустӕгидӕр ниййахӕвдӕг дӕн.

– Ӕрхезӕ, ма тӕрсӕ, нӕ дӕбӕл исардаудзӕнӕн дӕ мади.

– Мӕ къах сагели ниххастӕй, – мӕ бон нӕй ӕрхезун.

Зӕронд силгоймаг ӕхе разилдта, рандӕ ’й ӕма тургъӕй даргъгомау асийнӕ, тухуолӕфтгӕнгӕй, ӕрбахаста. Ӕрхизтӕн, мӕ рони ци кӕрдтутӕ адтӕй, уони ин ӕ цормӕ рауӕгъдӕ кодтон.

– Хӕссӕ сӕ уӕхемӕ, дӕ мадӕ ӕма си дӕ хуӕрӕн дӕр мӕн номӕй фӕххай кӕндзӕнӕ, сӕ комтӕ райефхӕссонцӕ. Дӕхуӕдӕг ба дӕхе гъӕуай кӕнӕ, кӕрдтуй къалеутӕ дӕр еуӕй-еу адӕмтау сӕртӕг ӕнцӕ, ӕууӕнкӕ сӕбӕл нӕййес, ци усми никъкъӕрцц кӕндзӕнӕй дӕ къахи буни, кенӕ ибӕл дӕхе бауадзгӕй, е бӕрӕг нӕй. Цо, ӕма дӕ ку гъӕуа, уӕд мин мӕхецӕн зӕгъисӕ.

«Ӕвӕдзи, седзӕр ке дӕн, уой туххӕй мин фӕттӕрегъӕд кодта», – рагъуди кодтон мӕ меднимӕр, ӕндӕр иннети фӕсте ӕлгъетӕн дзурдтӕ дӕр ма ку ӕхста…

Уӕдӕй нурмӕ рацудӕй дзӕвгарӕ ӕнзтӕ. Раги бацудӕй е ’цӕг дуйнемӕ, Цӕгат Кавкази тӕккӕ фиццагидӕр силгоймӕгти ’хсӕн Социалистон Фӕллойни Бӕгъатӕри ном лӕвӕрд кӕмӕн ӕрцудӕй, еци Полий.

Берӕ хӕттити мӕ рауурститӕ кӕнидӕ цард, берӕ сӕртӕг, гадзирахат адӕмтӕбӕл исӕмбалдтӕн мӕ царди, ӕма-еу уӕд кӕддӕриддӕр мӕ зӕрдӕбӕл ӕрбалӕууиуонцӕ Полиййи кӕддӕри зундамонӕн дзурдтӕ: «Адӕм дӕр кӕрдтуй къалеутау сӕртӕг ӕнцӕ».

Мӕрдти цъӕх талатӕ исуадзӕ, Полий, ци раст адтӕ ду, ӕма дӕ ци ӕрӕгиау балӕдӕрдтӕн…

Ци рӕзи фингидзаг дин исцӕттӕ кодтон, е дин хӕлар уӕд!