19 майя 2022

КАДГИН ЛӔГ ГЪӔУАМА ЦИТГИЙНАГ УА!..

05.08.2021 | 15:40

Хъӕбӕлоти Билар нӕ республики сӕргъи ци рӕстӕг фӕцӕй, е бӕлвурд бӕрӕг даруй уомӕй дӕр, ӕма нӕмӕ еци рӕстӕги нӕ адӕмон хӕдзаради еугур къабӕзти дӕр фӕззиндтӕй дессаги искурдиадӕгин разамонгутӕ, кӕцити дӕсни ӕма хъӕппӕресгин архайди фӕрци Цӕгат Иристон ӕнтӕстгин адтӕй промышленнон, гъӕууонхӕдзарадон, социалон-культурон райрӕзти. Сӕ нӕмттӕ игъустгонд адтӕнцӕ айдагъ нӕхемӕ нӕ, фал ӕнӕгъӕнӕ Советон Цӕдеси дӕр, устур кадӕгонд син цудӕй.

Уонӕй еу адтӕй Мӕрзойти Хаджимусси фурт Хъазбег, гъӕууонхӕдзарадон разамонӕг, Социалистон Фӕллойни Бӕгъатӕр. Сӕрмагондӕй ӕй уой туххӕй имисӕн ӕма 3 июли ӕ райгурдбӕл исӕнхӕст ӕй финддӕс ӕма цуппаринсӕй анзи (1926-1991). Бӕгъатӕри ном ин лӕвӕрд ку ‘рцудӕй, уобӕл ба – финддӕс ӕма дууинсӕй анзи (1966 анзи 30 апърели). Бӕргӕ хуарз адтайдӕ, нӕ дзиллон хабархӕссӕг фӕрӕзнитӕ аци цаутӕмӕ се ‘ргом ку раздахтайуонцӕ, фал… Мах ба нӕ ихӕсбӕл банимадтан аци номдзуд лӕги ӕма ӕ берӕ хъиамӕттӕ ӕримисун. Ӕма абони нӕ газети 8-9 фӕрстӕбӕл мухур кӕнӕн, Мӕрзой-фурти туххӕй е ‘мгъӕуккаг, ӕ раздӕри синхон Дзугати-Мурасти Римӕ ци ӕрмӕг ниффинста, уой.