Гъигæдардбаййафæг адæмæн фæййагъаз кæнгæй, уоди федар æма бæгъатæрдзийнадæ ка равдиста, еци æртæ цæгатиристойнаг скъоладзауи хуарзæнхæгонд æрцудæнцæ кадгин нисан «Цæхæр зæрдæ»-йæй. Еугуруæрæсеуон æхсæнадон еугонди хуæрзеугутæ сувæллæнттæн равардта Цæгат Иристони Сæргълæууæг Сергей Меняйло.

– Сæрбæрзонд дæн, не ’хсæн уæхæн кæстæртæ ке ес, уомæй. Адæймаги фидбилизæй фæййервæзун кæнун – е æцæг бæгъатæрдзийнадæ ’й. Æма кæд нурма хуæрзæвзонг айтæ, уæддæр сумах багъæуаги сахатти, уæхе уодтæбæл нæ гъуди кæнгæй, агъазгъæуагæ адæми фарсмæ балæудтайдæ, – æ арфи дзубандий фæббæрæг кодта республики разамонæг.

Еци дзурдти хæццæ Цæгат Иристони Сæргълæууæг кадгин нисантæ равардта 11-анздзуд Мирикати Артурæн, 13-анздзуд Къубалти Камилæ æма 14-анздуд Золойти Анжеликæн.

Сергей Меняйло райарфæ кодта скъоладзаути ниййергутæ æма гъомбæлгæнгутæн дæр. Етæ, æнæмæнгæ, сувæллæнтти зæрдити игурун кæнунцæ адæймаги уодигъæди хуæздæр менеугутæ, æфтаунцæ сæ уодварнон хæзнатæбæл. Камилæ æма Анжеликæ æмбæлттæ ’нцæ. Еци бон Мæздæги сæйраг фæзи сувæллæнттæн исаразтонцæ аллихузон хеерхæфсæн мадзæлттæ. Гъазæн финкæ кæми исцагътонцæ, еци бассейни астæумæ бацæугæй, кизгуттæй еу æ къах цæбæлдæр искъуæрдта. Лæмбунæг æркæститæ кодтонцæ, æма си 5-анздзуд биццеу разиндтæй. Уайтæккæ ’й фелвастонцæ æма базудтонцæ, сувæллон ке нæ уолæфуй уой. Ниййергутæ æма иннæ адæм бассейнмæ идардгомау ке адтæнцæ æма сæмæ агъазмæ фæдздзорунæн фадуат ке нæ адтæй, уой лæдæргæй, дууæ кизги сæхе хъауритæй архайун райдæдтонцæ. Биццеуæн æ реугудур æууæрдун райдæдтонцæ, æма еуцæйбæрцæдæр рæстæги фæсте биццеу исуолæфтæй.

Артур ба тезгъо кодта дони билгæрæнтти. Еу афонæ имæ фегъустæй кедæр агъазагор гъæлæс. Цади билæмæ хæстæгдæр бауайгæй, Артур ехгин дони рауидта сувæллони. 7-анздзуд Дамирæн æ къах ехбæл фæггурдæй, æма дони исмедæг æй. Артур айтæ-уойтæ нæбал фæккодта æма донмæ ниггæпп кодта. Гъигæдардбаййафæг дони бунмæ куд нихъулдæй, уотæ ма ’й æ цонгæй райахæста æма ’й билгæронмæ раласта.

Еугур еци хабæрттæ фембæлди архайгутæ еума хатт æримистонцæ, зæрдиагæй арфитæ кодтонцæ æригон бæгъатæртæн..

Нæ уацхæссæг