Æгас бæстæбæл дæр райгъустæй хабар, фæсхонхи, дан, ес уæхæн мæнгæдзорæг, æма ибæл некема фæхъхъаурæгиндæр æй. Еци хабар фегъустонцæ иннæ мæнгæдзоргутæ дæр. Уæд дин еууæхæни дæснидæр мæнгæдзоргутæй еу æхе исрæвдзæ кодта, къуæрей фагæ хуæруйнаг æ хæццæ райста æма цæунтæ райдæдта фæсхонхи гъæумæ. Цæйбæрцæ фæццудайдæ, ка ’й зонуй; æ дзабуртæ бафехсудæнцæ, æ уæледарæс никъкъуæхтæ ’й, æ хуæруйнæгтæ фæцæнцæ, уотемæй бахъæрттæй мæнгæдзорæги гъæумæ.

Ку бахæстæг æй, уæд ставд уаруни æртæхтæ хаун райдæдтонцæ. Нур ке бафæрса æ фусуни хæдзарæбæл? Кæсуй, æма дин уæлæ дони билæбæл еу биццеу цидæртæ косуй:

– Зæгъай мин, хуарз биццеу, мæнгæдзорæги хæдзарæ кæци рауæн æй?

Биццеу æ куст фæууагъта, бæлццонмæ сæрæй бунмæ æркæститæ кодта, уæдта ин уотæ зæгъуй:

– Ами нæй, арв æмпъозунмæ рандæй.

Бæлццон къехæй райзадæй. Биццеу æй уотемæй рауингæй ин, ку зæгъидæ уотæ:

– Ци никъкъехтæ дæ, мæнæ хуарз лæг, уарун нæ уинис? Е арв фæцъцъасæ ’й, æма уой æмпъозунмæ рандæй.

«Гъе дин, гъе, – зæгъгæ, рагъуди кодта бæлццон, – сæ сувæллæнттæ уотæ дзуапгин кæмæн æнцæ, уонæн ма уанæбæрæг сæ мæнгæдзорæг цæхуæн æй!..» – æма фæстæмæ фæззилдæй.

Аци хабар æ рæстæги ниффинста  Хъазбегти Хъазбег. Æ радзорæг бæрæг нæй. Цæгат Иристони гуманитарон-социалон  æртасæнти институти архив.