Къарæ ист æй социалон хизæгтæй

Райдæдта нæуæг ахури анз, æма мингай ахурдзаутæ аци бæнтти нæуæгæй рараст уодзæнæнцæ се скъолатæмæ. Сæрди фæлладуадзæн мæйти дæргъи сæ, ка ’й зонуй, æма цидæртæ райронх унцæ, надбæл цæугæй, уой бæрцæ къæрцгъос, ка ’й зонуй, æма ма уонцæ. Уомæ гæсгæ, аци рæстæг хестæртæ гъæуама уонцæ уæлдай бæрнондæр.

Сувæллонæн æ бон æй, æма, нади сæрти цæугæй, фæкъкъех уа, кенæ ба хуæдтолгити надмæ æвеппайди рауайа, кенæ ба лæугæ ка кæнуй, уæхæн хуæдтолги къилдунæй надмæ рагæпп кæна. Етæ шофертæй иронх гъæуама ма уонцæ æма, скъолай кенæ рæвдауæндони размæ, æрлæууæн бунатмæ кенæ нади сæрти хезуни бунатмæ фæххæстæг кæнгæй, сæ цуд гъæуама фæууорамонцæ æма багъæуаги сахълæуд никкæнунмæ гъæуама уонцæ цæттæ. Хуæдтолги хæстæгмæ рохсгæнæнтæ бонигон дæр гъæуама содзонцæ, уотемæй хуæдтолгæ идардмæ дæр зиндзæнæй æма уомæ гæсгæ сувæллонæн уодзæнæй æдасдæр, нади сæрти ку хеза, уæд.

Ниййергутæй сæхецæй дæр гъæуама иронх ма уонцæ нади сæрти цæуни æдасдзийнади домæнтæ, уæдта сæ сæ сувæллонæн дæр алли бон æ зæрдæбæл гъæуама лæуун кæнонцæ. Хæдзарæй скъоламæ ци над ес, еци надбæл еумæ рацотæ æма ибæл куд цæун гъæуй, еци æгъдау ин байамонетæ. Сувæллони уæледарæсбæл, æ хурдзинбæл, æнæмæнгæ, гъæуама уонцæ, талинги дæр тæмæнтæ ка калуй æма рохс ка кæнуй, уæхæн листæг хæйттæ.

Сувæллæнттæн дæр нæ зæрдæ зæгъуй, цæмæй надбæл цæугæй, уонцæ къæрцгъос æма лæмбунæг. Нади сæрти цæмæй хезонцæ, сæрмагондæй, уомæн бунат амунд кæми ес, (уруссагау æй хонунцæ «зебра»), айдагъдæр еци рауæн æма фестæгæй цæугутæн ци рохсмæ æмбæлуй (гъома, цъæх рохсмæ), айдагъдæр уæд. Надбæл цæугæй, æ сæрти хезгæй, телефонæй пайда кæнун не ’нгъезуй, гъости дæр наушниктæ гъæуама ма уа, – надбæл цæугæй адæймаг æнæгъæнæйдæр гъæуама феста цæститæ æма гъостæ. Велосипедбæл кенæ самокатбæл цæугæй, нади сæрти хезгæй си гъæуй æрхезун æма фестæгæй рацæун.

Хъазар хестæртæ! Сумахбæл æвæрд цæуй уæлдай бæрнондзийнадæ. Уæ сувæллонæн уи алкедæр хуæздæр дæнцæн ке æй, е уи иронх ма уæд.

Еумæйагæй нæ нæдтæ нæ сувæллæнттæн искæнæн æдас æма амондгун! Нæуæг ахури анз амондгунæй райдайетæ!

Республикæ Цæгат Иристон-Аланий Паддзахадон автоинспекций пресс-службæ