Уæхæн æй сæ нисанеуæг, фæстаг рæстæги нæмæ ци закъонадон æййивддзийнæдтæ фæззиндтæй,  уони  нисанеуæг. Ракæндзинан си цалдæрей кой.

Надбæл цæуни æдасдзийнади нæуæг домæнтæмæ гæсгæ, минкъий сувæллæнтти ласунæн хуæдтолгити гъæуама уа хецæн уорамæн фæрæзнæ – сæрмагонд бадæн, хуæдтолги æвæргæ авдæнæ кенæ, «бустер» ке хонунцæ, уæхæн бадæн. Нуртæккæ кæмæй пайда кæнунцæ, æма тасгæ ка кæнуй, еци уорамæн фæрæзнитæ сувæллæнтти æдасдзийнадæн агъазгæнæгбæл нимад нæбал цæунцæ. Уæ зæрдæбæл уин æрлæуун кæнæн: хуæдтолги сувæллæнтти ласуни æдасдзийнади домæнтæ ихалуни туххæй шофертæ иваргонд цæунцæ æртæ мин сомемæй (Уæрæсей Федераций Административон барадæихæлдтити кодекси 12.23 статьяй æртиккаг хаймæ гæсгæ).

Августи фиццаг бонæй æ тухи ци ГОСТ бацудæй, уонæмæ гæсгæ кæстæр кълæсти ахурдзаутæн сæ хизинти уæзæ 700 граммемæй фулдæр гъæуама ма уа, хестæркъласонтæн ба – еу килограммæй фулдæр. Е – айдагъ хизини уæзæ.

Изæрдалинги дæр хизинтæ цæмæй бæрæг даронцæ, уой туххæй сæ фæрстæбæл гъæуама уонцæ, таллинги ка ‘рттевуй, уæхæн  бæрæггæнæнтæ. Хизини кæрæнттæ циргъ гъæуама ма уонцæ. Кæстæркъласонтæн сæ усхъитæбæл даргæ хизинти рæнттæн сæ дæргъæ гъæуама уа 60-70 сантиметри, сæ уæрхæ ба – 2-4 сантиметри.

*  *  *

Аци анзи дуккаг æмбесæй æ хъаури бацудæй, скъоладзаути уæледарæсæн еумæйаг уагæ ка дæттуй, паддзахадон уæхæн стандарт. Документ æ хъаури бацудæй июлæй.

Нæуæг домæнтæмæ гæсгæ, скъоладзауи формæ гъæуама уа æнцондарæн бадунæн дæр, змæлунæн дæр, бакастæй ба – аййев, рæсугъд æма зæрдæмæдзæугæ. Закъонмæ гæсгæ ка не ‘нгъезуй, уæхæн нисантæ ибæл гъæуама ма уа. Æнгъезуй паддзахадон æма патриотон æнкъарæнтæ ‘взурæг нисантæ ибæл цæмæй уа, е.