Цæгат Иристон Сæргълæууæг Сергей Меняйло Координацион совети æмбурди æрдзубанди кодта сувæллæнттæ æма фæсевæди еугуруæрæсеуон «Фиццæгти æзмæлд»-и регионалон хайади архайд æма ирæзти фарстатæбæл. Видеобастдзийнади фæрци дзубандий архайдта «Фиццæгти æзмæлд»-и регионалон æмархайди  департаменти разамонæг Ольгæ Негрова.

Совети иуонгтæн Сергей Меняйло куд радзурдта, уотемæй, ирæзгæ фæлтæртæ гъомбæлгæнгæй, ахсгиаг æй системон политикæй пайда кæнун, æригæнтти æргом æхсæнадон-политикон гъуддæгутæмæ æздахун:

– «Фиццæгти æзмæлд» абони æй фæсевæдон политикæ æма ахуради гъуддæгути ’хсæн ахедгæ коммуникацион фæрæзнæ. Ахурадæмæ хаунцæ 6 анземæй ба 25 анзей уæнгæ ирæзгæ фæлтæртæ. Цæгат Иристони нерæнгæ бал байгон кодтан æзмæлди 240 райдайæн хайади, «Фиццæгти æзмæлд»-и ес 91,5 мин иуонги æма зундамонæги, – фæббæрæг кодта Сергей Меняйло.

Ольгæ Негрова куд радзурдта, уотемæй гъуддаг сæрдигон фæлладуагъд исаразуни хæццæ баст гъæуама ма уа. Сувæллæнтти хæццæ, ниййергути хæццæ еудадзуг косун гъæуй, сæ кæцифæнди гъуддаги дæр архайун, сæ рази ун.

– Фæсевæд кæддæриддæр кæсунцæ хестæртæмæ, фæнзунцæ сæ. Регионалон хайадæ æ алфамбулай зингзæрдæ адæм ке æрæмбурд кæндзæнæй, е ми æруагæс кæнуй.

Совети æмбурди ма æркастæнцæ, «Фиццæгти æзмæлд»-и регионалон хайади архайд анзи фиццаг æмбеси куд рауадæй, уомæ дæр.

Цæгат Иристон-Аланий Сæргълæууæг æма Хецауади пресс-службæ