2021 анзи 15 июнæй 31 июли уæнгæ сæрмагонд къамис есдзæнæй Хъæбæлоти Билари номбæл сæрмагонд паддзахадон стипенди иснисан кæнуни фæдбæл конкурсмæ гæгъæдитæ. Уой туххæй фегъосун кодта Республикæ Цæгат Иристон-Аланий Ахурадæ æма науки министради пресс-службæ.

Зундгонд куд æй, уотемæй æхсæнадон æма политикон архайæг Хъæбæлоти Билари номбæл сæрмагонд паддзахадон стипенди нисангонд æрцудæй Цæгат Иристони Хецауади унаффæй 2017 анзи. Премий туххæй уагæвæрди куд загъд ес, уотемæй аци хуæрзеуæги нисан æй уæлдæр æма астæуккаг профессион ахуради хуæздæр студентти рабæрæг кæнун, сæ ахурадон, наукон-æртасæн æма исфæлдистадон архайдæн син уæлæнхасæн фадуæттæ исаразун. Стипендий аллимæйон бæрцæ æй 10 мин соми, стипендиантæн фист цæуй еу ахури анзи дæргъи.

Преми райсунмæ кандидат исуни барæ ес уæлдæр æма астæуккаг профессион ахуради организацити бонигон ахури студенттæн.

Кандидат скъола каст гъæуама фæууа Цæгат Иристони æма æ ахурадон, наукон-æртасæн æма исфæлдистадон архайди æнтæстдзийнæдти æвдесæнæн гъæуама къамисмæ бадæтта аллихузон олимпиадитæ, конкурстæ æма фестивальти ци грамотитæ, сертификаттæ æма æвдесæндартæ рамулдта, уони дæр.

Кандидатти номхигъд куд федаргонд цæудзæнæй, уой фæтки туххæй, уæдта гъæугæ документти номхигъди хæццæ базонгæ уæн ес Республикæ Цæгат Иристон-Аланий Ахурадæ æма науки министради официалон сайти.

Зæгъун гъæуй, 2017 анзæй нури уæнгæ Хъæбæлоти Билари номбæл сæрмагонд паддзахадон стипенди 28 студенттемæн ке исаккаг кодтонцæ, уой дæр.