14 июня 2024

«КАРНÆЙ ÆГИРИДДÆР НÆ ГЪАСТ КÆНУН…»

31.03.2023 | 13:01

Уотæ кæддæр загъта нæ Иристони цитгийнагдæр лæгтæй еу, Битъæти Роберт. Æма æ еци загъд æруагæс кодта, кадæриддæр æй зудта, уонæй сæ еугуремæй дæр. Уомæн æма е æцæгæйдæр адтæй цардбæллон, рæстуодæй æма зæрдхæларæй æ карнæ ка аразта, уæхæн адæймаг. Нæ рагфидтæлти загъд «Адæмуарзон адæймаги  амондæй дуккаг амонд дæр райгуруй!..» æнæгъæнæйдæр хауй Битъæти Робертмæ  дæр. Уомæн æма æ амондæй хайгин кодта дзилли дæр, кæд естæмæ тундзтæй, уæд, фиццагидæр, ескæмæн ести хуарз ракæнунмæ, уой туххæй адæмæн адтæй хеуон æма зæрдтагон.

Битъæти Александри фурт Роберт райгурдæй 1943 анзи 20 мартъий Синдзигъæуи. Цæгат Иристони паддзахадон педагогон институти физикон гъомбæлади факультети ахур кæнгæй, æ устурдæр бæлдæ баст адтæй театри хæццæ. Раздæр бал уордæмæ бацудæй декорацитæ æвæрæгæй, фæстæдæр ба ин æрæстæфтæнцæ æ искурдиадæ, равардтонцæ ин кæцидæр рольти хе бавзаруни равгæ. Æ еци фиццаг рольти уойбæрцæбæл фескъуæлхтæй æма ибæл банвæрстæнцæ, куд исуйнаг искурдиадæгин актер, уотæ.

Ирон театри сценæбæл Битъæти Роберт рагъазта нигулæн-европаг, уруссаг æма национ драматургий дæс æма æртинсæй ролемæй фулдæреми. Уоми æмхузон хуарз аразта куд драмон, уотæ комедион сорæттæ дæр. Сæ фулдæр бацудæнцæ Иристони сцени аййевади хæзнадонæмæ.

Берæвæрсуг искурдиади хецау Битъæти Роберт е сценикон архайд байеу кодта телерадиокомпани «Алания»-й хæццæ, цæттæ кодта Иристони культурæ æма аййевади зундгонддæр архайгути туххæй радиобакаститæ æма телевизион равдиститæ.Адтæй Цæгат Иристони паддзахадон университети аййевæдти факультети доцент.

Маддæлон æвзаг æновудæй ке уарзта æма ин æнхæстæй ке зудта æ гъæздуг гæнæнтæ, е ин равардта дуйнеуон драматургий уадзимистæ уруссаг æвзагæй ирон æвзагмæ ратæлмац кæнуни барæ. Финста ма зартæ дæр ирон спектакльтæмæ.

Адтæй режиссер-æвæрæг дæр. Дигорон театри сценæбæл исæвардта цалдæр спектакли. Битъæти Роберт ма разамунд лæвардта Чиколай адæмон театрæн дæр, кæци берæ ахсгиаг еугуруæрæсеуон исфæлдистадон еристи фæууæлахез æй.

Битъæти Роберт Чиколай адæмон исфæлдистади бæрæгбони архайгути хæццæ.

Тæбæхсаути Балой номбæл Ирон паддзахадон академион театри раздзæуæг актертæй еу, Уæрæсей Федераций æскъуæлхт артист, Цæгат Иристони адæмон артист, Хонсар Иристони æскъуæлхт артист Битъæти Роберт нæ национ культурæ æма аййевадæн, нæ адæми уодварнон райрæзтæн ци берæ хуæрзти бацудæй, е бæлвурдæй-бæлвурддæр æй. Уой хæццæ ба ма ни федарæй æруагæс кæнуй е дæр, æма ма ин никки фулдæр  ке бантæстайдæ æ еци уодвæллойни. Фал… Уоййасæбæл боз кæмæй адтæй, æ еци карнæ ибæл гадзирахаттæй рацудæй – æртæ анзей размæ (2020 анзи) фæззигон хорзæрийнæ бони æ уæлзæнхон цардæй рахецæн æй Битъæти Роберт…

Рагон разагъди лæгтæй еу уотæ загъта: «Мæ зæрдтагон адæймæгутæй еске ку рамæлуй, уæд мæ зæрдæй дæр еу къæрт бастъæлуй». Махмæ гæсгæ, еци саударæн бæнтти хъæбæр  берети зæрдити еугай нæ, фал цалдæргай къæрттитæ бастъалдæй….

Уæдæй абони уæнгæ нæй иронх нæ дзиллæй Битъæти Роберти рохс ном… Абони ба ’й уомæ гæсгæ имисæн, æма 20 мартъий æ райгурдбæл исæнхæст æй цуппаринсæй анзи (1943-2020). Уой фæдбæл абони ци æрмæгутæ мухур кæнæн, уонæй еуей,  зундгонд журналист Черчести Хъасболат кæддæр (2013 анзи) Битъæти Роберти хæццæ ци интервью бацæттæ кодта, уой уомæ гæсгæ равзурстан, цæмæй еума хатт райгъусонцæ æ  курухон гъудитæ. Бафæндадтæй ма нæ, цæмæй Роберти туххæй сæ зæгъуйнæгтæ зæгъонцæ, хуарз зонгæ ке хæццæ адтæй æма зæрдтагон кæмæн адтæй, етæ дæр.