Артаги нæфагæдзийнади æма æ уæйæ кæнуни бæрзонд æргъти фудæй нæмæ нуртæккæ ци уавæр исæвзурдæй, е хъæбæр тухсун кæнуй адæми, сæ цардиуаги син берæ цидæртæ фесинмитæ кæнуй. Уомæ гæсгæ ба уавæр фæррæвдзæдæр кæнуни фæдбæл цидæр мадзæлттæ дæр арæзт бæргæ цæуй, фал си уæддæр æнæмæнгæ исаразуйнæгтæ еугурæй нæма æрцудæнцæ хузæнæнгонд.

ÆРГЪТÆ – ДОГЪОН БÆХТÆЙ ДОГЪОНДÆР

Уой фæдбæл цудæй дзубанди, æрæги монополити нихмæ федералон служби регионалон управлени æма цæрæнуатон-коммуналон хæдзарадæ, артаг æма энергетики министради разамундæн, хецæн адæймæгути бæрни бунæттон артаг æвгæнæн устурдæр станцити уони минæвæртти хæццæ фембæлди рæстæг.

Дзубанди рауадæй нефти продуктти уавæри æма артаги æргъти фæдбæл. Станцитæ «Гефест», «Троя», «Барс»-и разамунд куд загътонцæ, уотемæй АИ-92 артаги аргъ 100 сомемæй минкъийдæрæй уæйæ кæндзæнæнцæ. Уотемæй сæхуæдтæ æфтуйаг æгириддæр нæ есдзæнæнцæ. Хецæн адæймæгути бæрни уæвæг артаг æвгæнæн станцити хецауадæ куд радзурдтонцæ, уотемæй тагъд Монополити нихмæ федералон служби регионалон управлени æма цæрæнуатон-коммуналон хæдзарадæ, артаг æма энергетики министрадæмæ бадæтдзæнæнцæ документтæ. Нуртæккæ станцити ци æргътæ æвæрд æрцудæй, уонæн бундор ке ес, уой документтæ æвдесдзæнæнцæ.

Аци гæгъæдити бæрæг дардзæнæй артаг балхæнуни аргъ, артаг æрбадæттуни æмгъудтæ, товарти-транспорти уæлæфтауæн гæгъæдитæ, æндæр  хæрзтæ – етæ кæронбæттæни фæббæрæг унцæ артаги аргъбæл. Нуртæккæ цæрæнуатон-коммуналон ведомствæ бæрæг кæнуй артаг æвгæнæн станцитæ, артаги аргъ  æгæр бæрзонд кæми разиннуй, аргъи бæрзонд æмвæзадæ документтæй ефтонггонд ку нæ фæууй, уæд станци нихмæ карз æфхуæрæн мадзæлттæ аразунцæ.

… Карз æфхуæрæн мадзæлттæй æвзедунтæй ести уæд рауайдзæнæй, æма бæлвурд хузи æнхæстгонд ку цæуонцæ. Æндæра уотид тубутт-зубуттæ кæнунæй ба ди неке фæттæрсдзæнæй, уæлдайдæр ба æдзæсгондзийнадæ æ уодигъæди кæмæн æй, етæ…

ÆРГЪТÆМÆ – ПАДДЗАХАДОН ЦÆСТДАРД

Нæуæг анзи 1 январæй паддзахадæн фæззиндзæнæй хуайраги æргъти ирæзтмæ цæстæ даруни нæуæг фæрæзнæ.

Хъалонти федералон служби игъосункæнуйнаги бундорбæл хецауадæн æ бон уодзæнæй цæстæ дарун, тукæнтти тæрхæгутæмæ ка бахъæрттæй, товари айдагъ еци аргъмæ, æ рауадзæгæй райдайæ, æма,  тукани уæнгæ цалинмæ нæ бахъæртуй, уæдмæ æ аргъ куд æййевуй, уомæ дæр.

Хуайрагæн æ аргъ уæлæмæ, миййаг, æгæр ку ниццæва, уæд паддзахадæн æ бон уодзæнæй рабарун розници аргъ, æма, товар раздæр ци къæпхæнбæл рацудæй æма ин уоми ци аргъ адтæй, уой хæццæ. Зæгъæн, æ рауадзуни хæрзти хе аргъ ке фæффулдæр æй, хуайрагæн æ аргъ уой фудæй исбæрзонд æй, æви фæстæдæр ци къæпхæнтæбæл рацудæй, уоми? Еци гъуддаг æртасдзæнæй паддзахадæ.

Уой хæццæ ма, æргътæбæл тæккæ фулдæр бафтауæн цæйбæрцæ æнгъезуй, еци еумæйаг бæрцæбæл дзубанди нæ цæуй, уæдта  розници тæккæ фулдæр аргъ федаргонд æрцæуа, нæуæг закъон уой нæ амонуй. Товар, еуæрдигæй, ци аргъæй æлхæд æрцæуа, кенæ, ци хæрзтæ байагора, иннердигæй ба – тукани ци аргъбæл уæйæгонд цæуа, еци дууæ аргъей ’хсæн хецæндзийнадæ æгъдауихалæн миуæбæл нимад нæ цæудзæнæй: алкедæр æй лæдæруй, розници аргъмæ хаст ке цæунцæ хæрзтæ – товар ласуни хæрзтæ (логистикæ ке хонунцæ, е), багенди есуни гъуддæгутæ, адæми мизд æма æндæр хæрзтæ.

Æргъти ирæзтмæ цæстæ даруни нæуæг фæрæзнæн æ нисан æй æндæр: æргътæ куд арæзт цæунцæ æма цæй фудæй бæрзонд кæнунцæ, уой лæмбунæг æртасун.