25 майя 2022

КИУНУГӔ, ДАН, КӔМИ ЕС, ФИНСӔГ ДӔР УОМИ ЕС!..

05.08.2021 | 16:02

Ӕма, ӕцӕгӕйдӕр, уотӕ ке ‘й, е бӕлвурдӕй рабӕрӕг ӕй, мӕнӕ ӕрӕги Дзӕуӕгигъӕуи ци равдист-армукъа «Бакӕсӕн еумӕ!..» рацудӕй, уоми. Ӕма уомӕй дӕр бӕрӕг адтӕй ӕ нисан – национ литературӕ ӕма киунуги ахедундзийнадӕ фӕббӕрзонддӕр кӕнун. Аци дессаги мадзал нӕмӕ цӕмӕй арӕзт ӕрцудайдӕ, ӕма цӕмӕй тӕккӕ хуӕздӕр хузи рацудайдӕ, уобӕл зӕрдиагӕй байархайдта нӕ республики мухури ӕма дзиллон коммуникацити гъуддӕгути фӕдбӕл Комитет.

Ӕ сӕрдар Фидарати Юрий уой фӕдбӕл уотӕ загъта:

– Ауӕхӕн фестиваль фиццаг хатт аразӕн. Фӕндуй нӕ, цӕмӕй адӕм нӕуӕгӕй се ‘ргом раздахонцӕ киунугӕмӕ, уомӕн ӕма уой фӕрци рагӕй дӕр дзиллӕ адтӕнцӕ уодварнӕй гъӕздуг. Рӕстӕг размӕ цӕуй, фал киунугӕ кӕсунӕн нуртӕккӕ ес берӕ гӕнӕнтӕ ӕма фадуӕттӕ. Уомӕ гӕсгӕ ами, гӕгъӕдийӕй конд киунугӕй уӕлдай фӕууинӕн ӕма бакӕсӕн ес аййевадон литератури уадзимистӕ, мингай зонадон ӕма бӕстӕзонӕн цӕмӕдессаг ӕрмӕгутӕ электрон уӕлӕфтауӕни фӕрци.

Фестиваль зӕрдӕмӕдзӕугӕ цӕмӕй рауадӕй, еци хуарздзийнӕдтӕй еу е ӕй, ӕма нӕ республики цӕргутӕн ӕма иуазгутӕн равгӕ фӕцӕй фӕууинунӕн ӕма балхӕнунӕн, Цӕгат ӕма Хонсар Иристони рауагъдӕнттӕй уӕлдай Кӕсӕг-Балхъари, Цӕцӕни киунугӕуадзӕнти фӕстаг ӕнзти ци бӕстӕзонӕн, аййевадон-литературон, публицистон, мемуаристон литератури киунугутӕ фӕууидтонцӕ рохс, етӕ – 500 медесгун киунугемӕй фулдӕр. Сӕ ӕргътӕ адтӕнцӕ тукӕнтти ӕргътӕй дзӕвгарӕ асландӕр.

Аци фестиваль ма киунугути равдиститӕй уӕлдай ма барӕсугъд кодтонцӕ ӕндӕр аллихузон мадзӕлттӕй. Тӕбӕхсаути Балой номбӕл Ирон академион театри актертӕ ба си бакастӕнцӕ ирон поэтти ӕмдзӕвгитӕ. Уой хӕццӕ ба мадзали архайгутӕ ӕма иуазгутӕ ами базонгӕ ‘нцӕ киунугӕ уадзуни гъуддаги ӕма, нуриккон электронон фӕрӕзнити фӕрци ‘й адӕммӕ куд парахатдӕрӕй бахъӕртун кӕнӕн ес, еци сосӕгдзийнӕдти хӕццӕ.